HVT tipi sa drug bust

CEBU, Philippines - Patay ang high value target sa Dakbayan sa Naga human nabawsan sa mga polis nga giingong iyang gipamusil atol sa buy-bust operation samtang nasikop ang inahan niini ug laing kauban diha sa Sitio Upper Centro, Barangay Langtad.

Ang nakalas mao si Nohlan Villarin, 21, residente sa maong lugar.

Samtang ang mga nasikop mao sila si Cirila Villarin, 57, inahan sa namatay ug Ricardo Segismar, 21, samtang nakaikyas ang usa ka nailhan lang sa pangalan “Boy        Aso.”

Matud pa ni Police officer 3 Jake Semilla, Desk Officer sa City of Naga Police Station, nagpahigayon og buy bust ilang team pinangulohan ni Senior Police Officer 2 Lucermindo Banaylo batok ni Villarin nga giila nga usa ka provincial level high value target.

Apan nagpabuto kini sa iyang armas dihang nabantayan niini nga polis iyang kasabot apan nabawsan ug wa na kaabot nga buhi sa Minglanilla District Hospital.

Nakuha sa crime scene ang drug paraphernalia, shabu, .38 caliber revolver nga armas, bala ug uban pa.

Samtang upat  ang nasikop sa mga sakop sa Philippine Drug Enforcement Agency-7 sa managlahing barangay sa Dakbayan sa Lapu-Lapu.

Nasikop sa Barangay Mactan si Rolando Baring, 38, ug nakuhaan  kini og dili mominos 1.5 gramos nga shabu nga mobalor og dul-an P8 mil.

Samtang nadakpan sa Sitio Soong Purok Mahayahay sa mao gihapong barangay sila si Ronielo Abing, alyas Onil, 29,  ug Mindo Genobaga, 34, nga nakuhaan og .30 gramos nga shabu.

Ikatulong nasikop mao si Carlo Degamo, alyas Janjan, 30, taga Barangay Alegria, Cordova nga nakuhaan og 15.40 gramos nga shabu nga mobalor og P77 mil. (BANAT NEWS)