Dul-an P5M shabu nasakmit sa buy-bust
CEBU, Philippines - Dul-an P5 milyones nga kantidad sa gituohang shabu ang nasakmit sa mga sakop sa Philippine Drug Enforcement Agency (PDEA-7) ug sa kapolisan sa duha ka buy-bust operation nga ilang gihimo.
Nadakpan sa taga PDEA-7 ang usa ka drayber og trisikad nga nadakpan sa buy- bust operation diha sa Sitio Bliss, Barangay Labangon ning Dakbayan sa Sugbo niadtong pasado alas 7 sa Sabado sa gabii.
Apan atol sa maong operasyon nakaeskapo ang target sa kapulisan nga si Jumar Umpad, alyas Avatar, samtang nadakpan si Mark Gonzales, 21.
Ang director sa PDEA-7, Dir. Yogi Ruiz miingon nga bag-ong player sa drugas si Umpad apan dinagko ang transaksyon niini sa drugas.
Gikasabot sa PDEA-7 si Umpad nga mopalit og 10 gramos nga shabu ug magkita sila diha sa atubangan sa usa ka tunghaan sa Labangon.
Apan nakabantay si Umpad ug gibiyaan si Gonzales nga nagdala sa usa ka plastic nga yellow nga dunay sulod nga daghang shabu.
Sa pagtimbang niini miabot og kapin usa ka kilo ang maong gituohang shabu nga dala ni Gonzales nga mikantidad og P4.3 milyones.
Si Ruiz miingon nga bisan og bag-o pa lang nga player si Umpad apan nalakip na kini sa “Top 19” ka mga drug dealers dinhi sa Central Visayas. Gisubay diin gikan iyang supply.
Si Gonzales nga nahinabi sa mga tigbalita mitug-an nga iyang higala si Umpad ug napugos pagdala sa shabu kay gisaaran kini nga hatagan og usa ka libo ka pesos kay iyang ipalit og gatas sa iyang anak.
Sa laing anti-drug operation, nadakpan sa mga sakop sa Cebu City Police Office sila si Gemrob Flores Bulambao, 25, alyas Biboy ug ang iyang inahan nga si Gema Flores Bulambao, alyas Gema, 51, diha sa Quijano Compound, Barangay Calamba.
Si Gemrob gikatahong apil sa drug watch list sa San Nicolas Police, Police Station 6. Usa ka paketeng shabu ang napalit sa asset sa kapulisan gikan sa anak hinungdan nga dali kini nga gisikop.
Nakuha sa mga polis kang Gemrob ang dugang 30 gramos nga gituohang shabu samtang nakuhaan ang inahan niini og 22 gramos nga gidudahan usab nga shabu nga tanan mokantidad og P613, 600. - /EIM) (BANAT NEWS)
- Latest
