EDITORYAL - Kataw-anan nga rason

Nagbanus-banos na lang ang mga warden sa Cebu Provincial Detention and Rehabilitation Center (CPDRC) ug sa Cebu City Jail apan nagpadayon gihapon ang problema nga makasulod sa bilanggoan ang shabu ug mga butang kontrabando.

Sa matag higayon nga adunay ilegal nga drugas ug mga butang kontrabando nga masakmit gikan sa selda sa mga piniriso, tangtangon dayon sa gobernador ug sa labaw’ng opisyal sa Bureau of Jail Management and Penology (BJMP) ang warden.

Tuod, ang bag-ong warden mopatuman usab dayon og estrikto nga mga lagda sa bilanggoan nga gitumong aron mahunong na ang pagpalusot og shabu ingon man ubang butang kontrabando.

Apan paglabay sa pipila ka semana, takulahaw na lang nga may mga piniriso nga masakmitan na usab og ilegal nga drugas ug butang kontrabando sulod sa ilang mga selda, sama sa cellphones.

Adunay mga nangagi nga warden sa provincial jail nga retiradong koronel sa kasundalohan ug kapolisan, ingon man aktibo gyud koronel ang mga sakop sa BJMP nga maoy gitudlo nga warden, apan ngano nga wala man sila makasumpo sa pagpayuhot og drugas?

Dili kaha ang pipila ra usab ka guwardiya maoy nagnegosyo pinaagi sa pagpamaligya og shabu ngadto sa mga binilanggo? Kun ayuhon lang gyud pagsusi ang mga tawo nga mosulod sa bilanggoan, imposible nga makapayuhot sila og shabu.

Apan ang dako nga pangutana mao kini. Ngano nga lakip ang cellphones nga lisud kaayo taguon, makasulod man sa bilanggoan? Kataw-anan ang sagad irason sa mga warden nga kuno, iitsa ra gikan sa gawas sa kural ang maong mga kontrabando ug kuhaon ra sa hingtungdang piniriso sa sulod.

Duna diay makahimo sa paglabay og mga butang kontrabando gikan sa gawas nga anaa may mga guwardiya nga nagbantay sa tower sa matag eskina sa bilanggoan? Kun tuohan ang taphaw kaayong rason sa mga warden, nagpasabot kini nga posible diay nga mangamatay sila diha kay sayon ra man sila itsahan og bomba?