‘Kidnapping’ false alarm ra

CEBU, Philippines - Ang kapulisan sa Lungsod sa Cordova nihimakak sa nikatap sa social media nga adunay mga minor de edad nga gi-kidnap ug gipasakay og van niadtong Biyernes sa  gabii diha sa Centro, Brgy  Ibabao sa maong lungsod.

Si Police Officer 3 Vilma Degamo  niklaro nga walay kamatuoran ang maong mga balita nga gipakatap sa netizens sa social media nga niresulta sa kabalaka sa mga taga Cordova.

Matud pa ni Degamo, adunay nitawag kanila nga concerned citizen nga nagpahibalo kabahin sa usa ka itom nga Hyundai Starex van nga nagparada diha sa kilid sa karsada nga dunay daghang mga bata sa sud niini.

Tuod man, pinaagi sa mando sa ilang hepe nga si Senior Inspector Clemente Ceralde giadto kini dayon sa kapolisan ug kompirmado nga adunay van nga adunay mga batang nag-edad 13 hangtud 17 anyos didto sa sud.

Apan matud pang Degamo ang maong grupo nga kauban sa mga bata diha sa van mga sakop sa usa ka non-governmental organization nga Bidlisiw Foundation nga nagpahigayon og anti- cyberporn/cybersex awareness program sa mga bata sa Cordova.

Nasuta usab nga pipila sa mga ginikanan sa mga bata nga nitambong didto gikatahong nasayod sa maong kalihokan.

Apan aron masiguro, gidala silang tanan sa presinto. Apan sama sa gihapon, aduna dayoy nikatap nga mga posts sa social media ilabi na sa Facebook nga nagbuhat-buhat og mga sayop nga balita bahin sa grupo.

Kini bisan wala pa gani mopagawas og opisyal nga pamahayag o impormasyon ang kapolisan sa Cordova.

Pinaagi sa social worker sa munisipyo nakompirmar gyud nga tinuod ang maong programa didto sa Bidlisiw Foundation ug nga nakaila gyud sa mga miyembro sa grupo ang ilang social worker.

Giklaro ni Degamo nga wala manirado ang van ug ang mga bata maoy tuyo nga nisud sa van kay komportable silang naglingkod ug naminaw sa lecture apan mao kadtoy nahitabo.

Hinuon ang kapolisan sa Cordova wala mobasol sa tawong nanawag sa ilang buhatan tungod kay maayo kadto. - /EIM) (BANAT NEWS)