Noble supak Barok himoong “deputy bosyo”
CEBU, Philippines - Dili pabor ang labaw sa kapolisan sa Probinsiya sa Sugbo nga mahimong deputy mayor sa Cebu Provincial Detention and Rehabilitation Center (CPDRC) si Alvaro Alvaro alyas Barok.
Si Senior Supt. Eric Noble nga nahinabi sa mga tigbalita niingon nga ang maong isyu ang angayang tan-awon sa acting warden sa CPDRC nga si Roberto “Bobby” Legaspi kung angayan ba sa maong posisyon si Barok gumikan kay usa kini sa mga dako nga personalidad nga nalambigit sa drugas.
“Huwag naman. Parang ano eh, para sa akin, hindi ko feel, it’s absurd, di ba?” matud ni Noble.
Sumala pa ni Noble nga kung kini mahitabo posibleng ma-impluwensiyahan sab ni Alvaro ang uban nga mga piniriso sa CPDRC.
Sa niaging greyhound operation nga gipasiugdahan sa Philippine Drug Enforcement Agency-7, niabot sa 70 ka cellphones ang nakompiska apil na ang cellphone nga iya ni Barok.
Wala nikomentaryo si Noble kabahin sa laing piniriso nga planong himoon nga mayor nga si Bienvenido “Jun” Noel kay wala siya kaila niini.Si Noel ang gikatahong higala sa kanhi CPDRC jail consultant nga si Marco Toral kinsa nakontrobersiyal niadtong 2015 gumikan sa pagdala niini sa pribadong tambalanan nga walay court order human naangol ang tiil gumikan sa basketball ug girehistro sa lain nga pangan. (BANAT NEWS)
- Latest
