Punerarya gilungkab, lungon wa hilabti

CEBU, Philippines - Usa ka punerarya gilungkab ug gikawatan, apan dili lungon ang gikawat sa suspetsadong kawatan nga nagtingkagol na karon sa bilanggoan kay siya nailhan tungod sa CCTV camera.

Si Nolan Diaz, tag-iya sa Saint Francis Funeral Home sa Natalio Bacalso Avenue, mitaho sa kapolisan nga gikawatan siya og mga salapi nga mokapin sa P100,000. Ang kapolisan miresponde dayon og base sa ilang imbestigasyon nasuta nga usa ka Yogen Varona Sasaki, 37-anyos nga usahay mamaligya og newspaper maoy milungkab sa opisina sa punerarya.

Gitan-aw sa kapolisan nga gipangulohan ni SPO4 Reynaldo Ramos ang footage sa CCTV ug nakita nila nga si Sasaki diha miagi sa ganghaan sa punerarya ug mipaingon sa opisina.

Giguba sa suspek ang siradora sa opisina sa punerarya ug dihang nakasulod na siya, gipanguha ang kuwarta nga gisulod sa lainlaing sobre didto sa drawer sa lamesa.

Ang tag-iya sa punerarya determinado nga mopasaka og kaso nga pagpangawat batok sa dinakpan aron kini mabalhug gyud sa bilanggoan. Aldreth Cayas (BANAT NEWS)