Kapin p.5m shabu sakmit, 18 sikop

CEBU, Philippines - Niabot sa P150 mil nga kantidad sa gituohang shabu ang nasakmit sa mga sakop sa Pardo Police gikan sa duha ka batan-on nga nadakpan sa ginukdanay sa N. Bacalso Avenue, Bulacao, Dakbayan sa Sugbo hangtud sa Siyudad sa Talisay pasado alas 2 sa nakalabay nga kadlawon.

Ang duha ka dinakpan giila nga sila si Angelbert Navarro, 20, ug Angelica Salarisma, 19, parehong nagpuyo sa Sitio Bahadas, Tabunok, Dakbayan sa Talisay.

Ang grupo sa Pardo Police Station nga gipangulohan ni Senior Police Officer 4 Rogelio Nedamo Jr. ang nihimo sa pagsubay sa maong dapit human sila nakadawat og impormasyon nga dunay namaligya og drugas sa may waiting shed sa usa ka tunghaan. Dihang duol na ang mga polis, tulo ka motorsiklo ang dali nga nipabulhot sa pagpadagan ug ang usa ka motorsiklo ang gisakyan sa mga suspek.

Nahitabo ang ginukdanay hangtud sa may Vista Grande sa Dakbayan sa Talisay ug naatangan sa kapolisan ang duha.

Ang backrider nga babaye maoy nakit-an sa mga polis nga dunay gilabay nga putos sa kilid sa dalan ug sa pagsubay sa mga polis ilang nakuha ang mga pinaketeng gituohang shabu nga kantidad og P150, 000.

Samtang nasikop sa kapolisan sa managlahing buy-bust operation ang lima ka gidudahang pusher og shabu sa Poblacion Oriental, Lungsod sa Consolacion.

Ang mga nadakpan mao sila si Charlie Flores, hingkod; Jennivev Villamor, 32; Carlo Cuajao, 26; Ralfh Anthony Isoto, 21, ug kauban nga 16-anyos.

Sa Dakbayan sa Lapu-Lapu, 11 ka tawo ang sikop sa managlahi nga operasyon sa kapolisan sugod niadtong Miyerkules hangtud kagahapon sa buntag.

Unang nasikop sa Sitio Ibabao, Barangay Basak si Valeria Puza, 63, biyuda ug walay trabaho; Marlon Puza, 30, dalaga ug walay trabaho, lakip ang kapuyo niini nga si Paolo Amores, 22-anyos.

Nakuha gikan sa mga dinakpan ang dul-an sa P4,000 nga balor sa drugas.

Ikaduhang operasyon nahitabo sa may Ibabao, Pusok diin nasikop sila si Ronald Ycong, 45, ulitawo ug walay trabaho, ug Armelyn Babaylo, 21, kinsa nakuhaan og dili mominus sa P19,000 nga balor sa drugas.

Ikatulong buy-bust nahitabo sa Sitio Soong I, Barangay Mactan diin nasikop si Edwin Yarag, 34, minyo, ug Gilbert Icot ug Allan Igot Jr., 22, samtang nakaeskapo si Anthony Pacquibot.

Nakuha gikan sa mga dinakpan ang 30 gramos nga shabu nga mobalor og dul-an sa P355 mil, boodle money nga P16,000 ug halin nga P3,000.

Laing nasikop sila si Ariel Aying, 25, Christian Ugsang, 25, ug Dennis Aying, 33, residente sa Maasiwa, Marigondon,

Nasakmit gikan sa mga dinakpan ang shabu nga mobalor og P60 mil, armas nga caliber magnum, bala ug kwarta nga dul-an sa P1,300. (BANAT NEWS)