Hiyas ni Rizal angayang sundon

CEBU, Philippines – Nanawagan si Presidente Rodrigo Duterte sa katawhan nga sundon ang mga hiyas sa bayani nga si Jose Rizal sa paghigugma sa nasud.

Si Duterte maoy nangulo sa paghandum sa kamatayon ni Rizal sa kauluhan diin siya nanawagan sa kahiusahan sa mga Pilipinhon ilabi na nga ang nasud ang padayong nakigbisog alang sa kagawasan.

Matud ni Duterte nga ang bag-ong hagit nga giatubang karon sa nasud mao ang kakabus, krimen, ilegal nga drugas ug kurapsiyon.

“Indeed, they are our present enemies. They are the modern invaders that subjugate our people’s hearts, minds and spirits,” matud ni Duterte.

Sa Dakbayan sa Sugbo, si acting Mayor Edgardo Labella ang nangulo sa kalihukan sa Plaza Sugbo.

Si Labella nidason sa pamahayag ni Duterte nga seryuso ang hagit nga giatubang sa nasud ug nanawagan sa mga kaubang opisyal nga mangita og solusyon sa maong mga problema ilabi na sa kakabus.

Matud niya nga ang kultura sa kurapsiyon ang nakagamot sa ilawom.

“Kay tingali si Rizal og buhi pa karon mobadlong gyud to siya nga ka grabe ba sa kurapsiyon,” matud ni Labella. Gitumbok ni Labella ang problema sa cybersex ug ilegal nga drugas nga pipila lang sa mga hagit sa nasud nga kinahanglang atubangon aron ang kamatayon ni Rizal dili mahimong walay kapuslanan.

“Today we are now breathing the air of freedom and democracy. Thanks to Dr. Jose P. Rizal and the other heroes,” matud ni Labella.

Nagpasalamat si Labella kang Duterte sa tinud-anay nga kampanya batok sa ilegal nga drugas, kriminalidad ug pamolitika.

Sa iyang bahin, si Dr. Warfe Engracia, chapter commander sa Order of the Knights of Rizal, namahayag nga gipili si Rizal nga bayani sa nasud tungod sa pagmahal sa kalinaw. - /GMR) (BANAT NEWS)