Galamay ni Jaguar gipanid-an
CEBU, Philippines - Padayon nga gipanid-an karon sa Police Regional Office-7 ang mga galamay ni Jeffrey Diaz alyas Jaguar nunot sa pagkabuwag-buwag human kini napatay sa mga polis sa kaulohan.
Kini ang gitug-an ni Chief Supt. Noli Taliño, director sa PRO-7, nga nahinabi sa mga tigbalita.
Matud ni Taliño nga sa pagkakaron nagkatibuagsa na ang grupo ni Jaguar ug kini sab karon ang ilang padayon nga gipanid-an.
Apil sa gisubay sa kapolisan kung nagpadayon pa ba sila sa pagnegosyo sa ilegal nga drugas ug kung asa na sila nagkuhaan og supply.
Kung makakita og saktong basehan ang kapolisan sa padayon nga ilegal nga kalihukan sa maong mga personalidad, andam sab nga mohimo og anti-drug operation ang mga operatiba.
Subli nga nahisgutan ang pangan ni Jaguar human nahisgutan ni Kerwin Espinosa, numero unong drug lord sa Eastern Visayas, ang pangan sa igsuon niini nga si Ryan Diaz atol sa imbestigasyon sa Senado.
Si Taliño niingon nga tanan nga nahisgutan ni Kerwin nga mga personalidad ang padayon nila nga gipanid-an.
Samtang nagpaabot pa sab si Taliño kung kinsa pa ang ilambigit ni Kerwin sa kalihukan sa drugas aron hingpit nga mapaatubang sa imbestigasyon ang mga nalambigit nga personalidad. (BANAT NEWS)
- Latest
