‘Salisi Gang’ gikan sa Manila sikop

CEBU, Philippines - Nagtingkagol sa selda sa Consolacion Police Station ang unom ka  sakop sa Salisi Gang gikan sa Tondo, Manila human sa ginukdanay dihang nakabiktima og negosyante sa merkado sa lungsod.

Matud ni Police Officer 1 Socrates Borinaga nga alas tres sa hapon niadtong Lunes nidangop sa ilang buhatan ang negosyante nga si Pablito Ceballos ug asawa human pito ka tawo ang nidagit sa ilang P350 mil. Pinanguluhan sa hepe nga si Police Senior Inspector William Homoc, nasundan ang Toyota Innova color silver nga dunay plate number RDV 702 hangtud sa may South Road Properties diin na-corner nila ang mga suspek apan nakaeskapo ang nagdala sa kwarta nga naila nga si Mark Anthony Rosales, 30-anyos.

Nasikop ang lider sa grupo nga si Sheena delos Santos, 40, ug mga kauban nga sila si Joyce Bautista, 28; Emiliano Villariaz Jr., 58; Michael John Fuentes, 21; Joveth Alfonzo, 32, ug Michael Salquero.

Nakuha gikan sa mga dinakpan ang duha ka .45 calibre pistol, pipila ka putos sa gituohang shabu ug drug paraphernalia, nagkadaiyang klase sa alahas, cellphones, mga bags ug IDs.

Matud ni Borinaga nga ang grupo nakaigo na sa ilang lugar sulod sa unom ka higayon.

Apan si delos Santos nipadayag nga una pa nilang higayon nga nakasalisi sa Sugbo pinaagi sa pag-abang og sakyanan gikan sa Manila. (BANAT NEWS)