Nag-videoke gipusil patay

CEBU, Philippines - Gitumbok nga badlungon ug notadong kawatan ang gipusil samtang nag-videoke duol sa ilang panimaye sa dalan Ceniza, Centro, Dakbayan sa Mandaue niadtong Martes sa gabii.

Patay na nga nadangat sa Mandaue City Hospital si Jimmy Vargas, 27, taga Zone 3, Mantuyong, sa maong dakbayan, kinsa gikatahong usa sa mga biktima sa dakung sunog sa niaging pipila ka buwan.

Si Vargas nakaangkon og samad pinusilan sa walang bahin sa mata hinungdan sa iyang kamatayon.

Matud ni Police Officer 1 Bernard Salimbot sa Mandaue City Police Station 1 nga duha ka anggulo ang ilang gitan-aw human ilang nasayran nga ang biktima adunay nakalalis nga grupo sa niaging semana ug posibleng panimawos ang motibo.

Base sa pamahayag sa pipila ka residente nga nagtaptap sa nawong nga nagsakay og motor ang nibira sa biktima dayong sibat.

Matud sab ni Police Officer 2 Jason Flores, desk officer sa Mandaue City Police Station 1, nga posibleng ang pagka-badlungon sa biktima ang hinungdan nga kini napusilan.

Gitug-an ni Flores nga kanunay sab  madakpan ang biktima tungod sa makanunayon niining pagpangawat. (BANAT NEWS)