Lola sikop sa buy-bust
CEBU, Philippines - Nagtingkagol sulod sa selda ang usa 55-anyos nga lola human nadakpan sa mga sakop sa Punta Princesa Police Station diha sa Sitio Cogon, Brgy. Labangon ning Dakbayan sa Sugbo tungod sa pagpamaligya og ilegal nga drugas.
Nasakmit sa mga sakop sa kapulisan gikan ni Florencita Garcia, ang mga drugas nga mikantidad og P250 mil, giingong level 2 drug pusher kini.
Ang hepe sa Punta Princesa Police nga si Senior Inspector Alvin Llamedo nga nahinabi sa Banat News nagkanayon niadtong higayona napalitan og P300 nga shabu ang suspek hinungdan sa pagkasikop kaniya.
Samtang mokabat sa P119,416 nga kantidad sa shabu, duha ka kalibre .357 nga armas ang nasakmit gikan sa gikatahapang pusher sa buy-bust operation diha sa Brgy. Masaba, Dakbayan sa Mandaue.
Si Police Officer 3 Roselo Campo sa Danao City Police Station miila sa ilang nadakpan nga mao si Victor Laurente, 55,nagpuyo sa maong dapit.
Duha ka paketeng shabu bugti sa P600 ang napalit sa mga polis hinungdan nga kini naposasan ug sa pagrekisa kaniya nakuha ang laing medium size nga shabu uban sa duha ka armas nga kalibre .9mm nga pistola. (BANAT NEWS)
- Latest
