Sikyu, dj, panday gipangdakop

CEBU, Philippines - Gidakop sa kapolisan ang usa ka security guard, disc jockey, karpentero ug empleyado sa Mactan Economic Zone ug lain pa’ng lima ka lalaki sulod sa lugar suyopanan sa Sitio New Sangi, Pajo, Dakbayan sa Lapu-Lapu sa niagi’ng Miyerkules sa hapon.

Matud ni Police Inspector Rex Ibañez, deputy chief sa Gun-ob Police Station 3, nga ang main subject nga si Reynante Degulacion, residente sa mao’ng barangay ang nakaikyas  sa buy-bust operation pasado ala-una sa hapon.

Si Degulacion kinsa naila nga alyas “Tete” ang gikatahong ilado nga drug personality sa Barangay Pajo ug matud ni Kapitan Junard Chan nga ang igsuon nga si Richard napusilan sa tuong bahin sa tiil ug nadakpan sa operatiba sa Lapu-Lapu City Police Office-City Intelligence Branch sa buy-bust operation sa Mayo 2015.

Nasikop mao ang sikyu nga si Almirante Castañares, 30;   DJ Romano Oficiar, 27;  ang karpentero nga si Rondino Cañete, 39, Ariel Paradero, 26, nga taga Barangay Basak ug production employee sa MEZ.

Naabtan sab sa kapolisan mao sila si Baser Amintao, 41; Eduardo Pepito, 46;  Alfredo Balauta Jr., 31, pulos molupyo sa Pajo; Antonio Baring, 47, residente sa Poblacion ug Glen Amen, 23, taga Pusok.

Nakuhaan og usa ka gamay’ng putos sa gituohang shabu si Baring sulod sa drug den samtang ang usa ka gamay’ng putos gikan gipalit sa police poseur buyer kang Degulacion, matud ni Ibañez.

Matud ni Ibañez nga ang silingan ang dugay na nga nakabantay nga dunay magsulod-gawas sa bakante’ng lote bisan og gikoral na apan nahadlok nga mosumbong sa polis basin makontrahan.

Ang siyam ka dinakpan natanggong na sa holding cell sa Gun-ob Police Station ug mag-atubang og kaso samtang gipangita pa sa kapolisan si Degulacion.

Samtang mokabat sa P118,800 nga kantidad sa shabu ang nasakmit sa kapolisan gikan sa usa ka gikatahapang pusher nga babaye sa Pitogo, Consolacion alas 8 pasado sa gabii.

Si Senior Inspector Ramil Morpos, hepe sa kapolisan sa lungsod, ang nangulo sa buy-bust operation human sa pipila ka adlaw nga pagpaniid sa ilegal nga kalihukan sa suspek.

Giila ang nadakpan nga si Jessica Sabellano Jalang, 43-anyos, taga Barangay Yati sa mao’ng lungsod. Si Police Officer 3 Jayson Gayo niingon nga ang mao’ng babaye gikasabot sa ila’ng poseur buyer nga nagpatuo nga kustomer.

Naglakip sa nasakmit ang tulo ka gagmay nga pakete sa shabu ug duha ka dagkong putos gikan sa dinakpan. (BANAT NEWS)