Sakop sa ‘criminal gang’ nasikop

CEBU, Philippines - Nadakpan sa kapolisan sa Lungsod sa Consolacion ang tulo ka sakop sa “criminal gang” nga naaktohan nga nagsuyop og ilegal nga drugas sa Sitio Nangka, Cabangcalan pasado alas 5 kagahapon sa buntag.

Matud ni Senior Insp. Wilson Abot, hepe sa Consolacion Police Station, usa sa mga suspek nagpaila nga minor de edad apan nakakuha sila og dokumento nga kini nag-edad na og 19-anyos.

Ang maong batan-on giila nga si John Perez samtang ang duha ka kauban mao sila si Gie-ar Paragsa, 19, ug usa ka 15-anyos, pulos taga Tugbongan sa maong lungsod ug nakuhaan og tag-usa ka pakete sa gituohang shabu.

Si Abot niingon nga ang criminal gang nga gisakupan sa mga suspek ang responsable sa pipila ka pagpang-hold-up ug pagpanglungkab sa mga tindahan.

Nalambigit usab sila sa kalihukan sa drugas nga gipangulohan sa usa ka alyas Sugar.

Gibana-bana ni Abot nga anaa sa halos 20 ka batan-on ug halos mga minor de edad ang sakop sa grupo diin daghan niini gikan sa Dakbayan sa Mandaue.

Plano karon ni Abot nga ilang makuha si alyas Sugar aron hingpit na nga maundang ang kalihukan sa grupo.

Nabungkag na kaniadto ang maong gang human nadakpan ang pipila ka sakop apan human sa pipila ka buwan nibalik ra usab.

Samtang nasikop sa kapolisan sa mao’ng lungsod ang usa ka tawo nga suspek sa pagpanulis sa usa ka tindahan sa Barangay Poblacion Oriental alas 3 pasado sa niagi’ng kadlawon.

Si Police Officer 1 Tirso Sol niila sa suspek nga si John Carlo Conde Flores, 19-anyos, nagpuyo sa maong dapit.

Ang biktima nga si Merlinda Cutab Arcilla, 46-anyos, nag-abli 24- oras sa iyang tindahan ug ang suspek kalit lang nisulod ug gitionan og kutsilyo ang biktima dungan ang pagdeklarar nga tulis.

Gikuha sa suspek ang halin sa biktima nga gisulod sa kaha ug nagdali kini pagpahilayo sa mao’ng dapit.

Sa follow-up operation nga gipangulohan ni Abot nasikop ang suspek kinsa nabalhug na sa bilanggoan. (BANAT NEWS)