Namoso, nag-video sikop

CEBU, Philippines - Nagtingkagol sa selda sa kapulisan sa Dakbayan sa Carcar ang usa ka 38 anyos nga lalaki human kini nasakpan nga namuso ug nikuha pa og video sa iyang selpon sa babaye nga naligo sulod sa usa ka pension house diha sa Barangay Poblacion III, pasado alas 11 sa nakalabay nga gabii.

Duha ka mga babaye nga parehos nga nag-abang sa usa ka lawak ang mireklamo sa kapulisan human sila gikuhaan og video samtang nagpuli-puli sila nga naligo sa banyo.

Ang duha ka mga biktima nga gitago ang pangalan pulos taga Tarlac ug Dakbayan sa Makati nga edad og 22 ug 31 anyos nga nagtrabaho sa insurance company.

Ang gidakop nga suspetsado mao si Nico Lalilan, lumad nga taga Tuburan ug nag-abang ra usab sa maong pension house.

Matud pa ni Police Officer 1 Raymond Amance, duty desk officer ug maoy nag-blotter sa maong hitabo nga nahinabi sa Banat News mibutyag nga samtang naligo sa banyo ang 31 anyos nga si alyas Apple iyang nabantayan nga nag-uyog-uyog ang kisame.

Sa iyang pagtan-aw sa taas iyang nakita ang tudlo sa suspetsado nga milusot sa kisame hinungdan nga dali kini nga mitawag sa caretaker sa maong pension house kinsa mitawag dayon og polis.

Ang mga sakop sa Special Weapons and Tactics (SWAT) team sa Carcar Police miresponde sa dapit ug ilang gidakop si Lalilan nga nagkamangkamang pa sa kisame.

Pag-abot sa presinto hilabihan nga nakapangayo og pasalyo si Lalilan sa duha. Si Amance miingon nga pasayloon na unta  kini sa 31-anyos apan sa dihang iyang nahibaw-an nga nakuhaan sila niini og video sa selpon  nagplano na kining mopasaka og kaso.

Nakuha gikan ni Lalilan ang usa ka selpon ug duna’y video samtang naligo ang 31 anyos.

Sa dihang nahinabi ni Amance si Lalilan kini miingon nga nadala lang gayod kini sa iyang kaibog sa maong babaye nga gihulagway ni Amance nga sexy, puti ug gwapa.

Gawas sa video sa 31 anyos wala na usa’y laing nakita nga video ang kapulisan. Giangkon usab sa suspetsado nga nakainom kini atol sa hitabo.

“Nadala ra gyod daw siya sa kaibog, sakpan gyud siya sa taga SWAT ibabaw sa kisame, maayo gani wala gilabay ang selpon o napasa ang kuha sa video,” matud pa ni Amance.

Karong adlawa gipaabot sa kapulisan nga mobalik sa ilang buhatan ang duha ka mga biktima alang sa pagpasaka og kaso sa dinakpan. (BANAT NEWS)