Papal Legate, kaubanan gisayawan sa mga priso

CEBU, Philippines – Mokabat sa 900 ka piniriso ang nihalad og sayaw sa mga dagku’ng opisyal sa Simbahang Katoliko nga nibisita sa Cebu Provincial Detention and Rehabilitation Center isip kabahin sa kalihukan sa  51st International Eucharistic Congress kagahapon.

Kini gisaksihan ni Cardinal Charles Bo, ang Papal Legate ni Pope Francis, mga obispo, kaparian ug delegado sa Myanmar.

Wala kaabot sa usa ka oras ang presentasyon nga gitambungan ni Cardinal Bo ug kaubanan.

Bisan sa pagbunok sa uwan, wala kini nakapatarug sa mga dancing inmates sa pagsayaw sa "They Don’t Care About Us" ug gisundan sa IEC theme song nga "Christ in Us Our Hope of Glory".

Matud ni Lito Granada, ang mayor de mayores sa CPDRC, nga daku kaayo ang ila’ng pasalamat tungod kay wala sila magdahum nga malakip sila sa mabisitahan sa Papal Legate tungod sa ka daku sa kalihukan.

Sumala pa ni Granada nga ila’ng gihangop ang pagbisita ni Cardinal Bo tungod kay bisan og naa sila sulod sa prisohan nalakip pa gihapon sila sa international nga kalihukan.

Si Carlo Vitero, 24-anyos, unom na ka tuig nga napriso tungod sa kaso sa drugas, nitug-an nga wala siya kasabot sa iya’ng gibati sa diha’ng nadapat ang iyang kamot sa kamot sa Papal Legate nga diin susama og nahutdan siya sa iya’ng gininhawa.

Malaumon si Vitero nga makahatag og dugang grasya kaniya ang pagbisita sa Papal Legate diin sa iya’ng pagbalik sa gawas human sa iya’ng sentensiya buligan siya nga dili na makasala pag-usab. Gibati usab og daku’ng kalipay si Vince Rosales, ang choreographer sa CPDRC dancing inmates, sa pagbisita ni Cardinal Bo tungod kay nawagtang ang ila’ng kakapoy sa pagpahigayon og praktis pipila ka higayon diin gihatagan sila og kahigayunan nga makita ang ila’ng gihagoan.

Si Cardinal Bo mapasalamaton sa mga priso ug awhag niya nga bisan anaa sila sa sulod nga dili gayud mawagtangan sa paglaum ug malaumon sa ila’ng paggawas sa prisohan nga adunay masanag nga ugma nga nagpaabot.

Gipasalig ni Bo ngadto sa tanang priso nga iapil sila’ng tanan sa iya’ng mga pag-ampo.

Human makahatag si Bo sa iya’ng mensahe sa tanang priso, ninaug kini padulong sa CPDRC grounds ug nakighimamat sa mga priso pinaagi sa pagpa-amen ug paglamano. – /GMR) (BANAT NEWS)