Pamilya sa OFW nga namatay gitabangan

CEBU, Philippines – Giklaro sa pamilya sa overseas Filipino worker (OFW) nga namatay sa Riyadh, Saudi Arabia nga gitabangan sila sa Kapitolyo nga mauli ang patay’ng lawas ni Lotis Camocamo.

Kagahapon ang inahan nga si Zenaida Yu, maguwang nga si Michelle Sereño ug ig-agaw nga si Norma Baron niatubang sa media aron pagdepensa sa buhatan sa gobernador.

Ila gihimakak nga gipasapasa lang sila sa buhatan ni Gobernador Hilario Davide III ug sa Provincial Social Welfare and Development Office (PSWDO).

Si Baron nipadayag sa ila’ng pasalamat sa buhatan sa gobernador nga mao’y nitabang kanila nga mahikay ang pagpauli sa patay’ng lawas sa biktima.

Nagpasalamat usab sila sa media tungod kay human napublikar ang hitabo, ang ahensiya sa biktima sa Manila nipadayag og tabang ug lakip ang employer sa biktima sa Saudi mipatim-aw na kini ug nitanyag na og tabang.

Gibutyag ni Baron nga adunay mga politiko ang nitawag kanila aron mosakay sa isyu ug nitanyag og tabang apan ang pamilya ni Camocamo nagdumili sa pagdawat sa tabang.

Matud ni Baron nga sa wala pa sila moduol sa buhatan sa gobernador, wala’y bisan usa nga nitabang kanila ug gani halos mawagtangan na sila sa paglaum sa ila’ng pagbalik-balik og follow-up sa Philippine Overseas Employment Administration (POEA).

Si Camocamo gikatakda na unta’ng mopauli sunod buwan apan namatay niadto pa’ng Oktubre 29, 2015.

Ang kabanay sa biktima niadto na’ng Disyembre nakahibawo nga namatay na kini pinaagi sa iya’ng bana nga toa usab nagtrabaho sa Saudi Arabia.

Ang pamilya nihangyo kagahapon sa Kapitolyo nga unta inig abot sa Manila sa patay’ng lawas madali kini sa pag-uli sa ila’ng lugar sa Dakbayan sa Toledo.

Si Baron nidugang nga kung mapahiluna na nila ang patay’ng lawas ni Camocamo mangayo sila og laing tabang kang Davide aron hatagan sila og abogado tungod kay nagplano sila sa pagpasaka og kaso batok sa recruiter ni Camocamo. – /GMR) (BANAT NEWS)