CCTO enforcer mokiha sa babaye’ng gikalalis

CEBU, Philippines – Nagtinguha kadto’ng traffic enforcer sa Cebu City Transportation Office sa pagkiha sa babaye kinsa nibutang sa Facebook sa video sa ila’ng panaglalis labot sa pagpasakay sa tiguwang atol sa Sinulog.

Matud ni Bonifacio Legarde, 54, nga gibati gyud siya og tumang kauwaw sa gibuhat sa batan-ong babaye nga naila nga si Gladys Morgan tungod kay ang mga tawo motan-aw na man ngadto niya bisan sa pagpasabot nga iya’ng gihimo.

Andam makig-estorya si Legarde sa babaye apan kung mangayo og pasaylo, kinahanglang i-upload usab kini sa FB sama sa iya’ng gihimo sa video.

Sumala pa ni Legarde nga pagdaut lang sa iya’ng dungog ang gibuhat sa babaye kay wala gi-video ang una nila’ng panag-estorya ug didto na lang nisaka iya tingug diha’ng wala na siya respetari.

Gibutyag ni Legarde nga nakig-chat sa iya’ng anak sa Facebook ang babaye ug laraw niini’ng makig-areglo.

Si Legarde, 28 ka tuig na sa trabaho, niatubang sa mga tigbalita aron paglimpyo sa iya’ng ngalan ug pagsaysay sa tinuod nga hitabo.

Una niini, nahitabo ang panaglalis ni Legarde ug Morgan diha’ng matud pa wala giatiman sa enforcer ang tiguwang nga babaye nga gusto’ng mosakay og taxi padulong sa Mabolo sanglit gikapoy na kini gumikan sa kataas sa iya’ng lakwon. Apan nagkanayon si Legarde nga samtang nagbantay siya sa trapiko niadto’ng higayuna, dunay niduol kaniya nga nagtulod sa wheelchair sa usa ka paralisado nga retirado’ng pari ug nangayo og tabang nga pasakyon kini og taxi.

Paglabay sa pipila ka minutos, laing hamtong nga babaye ang niduol kaniya ug nagpakitabang labot sa usa ka tiguwang nga babaye nga gusto’ng mosakay sab og taxi paingon sa Mabolo.

Iya’ng gipasabot nga unahon niya ang nag-wheelchair sanglit siya man ang una’ng nangayo og tabang ug ang tiguwang nga babaye nakasabot ug niuyon sa enforcer. Samtang na-busy pag-atiman sa trapiko ug pagpara og taxi, nakadungog si Legarde nga may nagsige og panawag niya nga batan-ong babaye ug kini mao si Morgan apan wala naatiman tungod sa kadaghan sa tawo ug sa mga nagpatabang.

Diha’ng nakaduol na sa iya ang dalagita, nakurat na lang kini nga giingnan siya og, "kuya, bungol ka?" ug nidugang nga dili ba siya maluoy sa tiguwang.

Matud pa nga giingnan pa si Legarde sa babaye nga "enforcer dili maluoy og tiguwang" sa upat ka higayon hinungdan sa iya’ng kauwaw sa mga tawo.

“Señor Sto. Niño ra ang mag-igo kaninyo,” mensahe ni Legarde sa mga nihatag og negatibo nga komento sa Facebook sa mao’ng hitabo.

Sa iyang bahin, si Atty. Rey Gealon, executive director sa CCTO, niingon nga nakaduso na si Legarde sa iya’ng affidavit inubanan sa pamahayag sa kaubanang enforcers nga nakakita sa hitabo.

Hangyo ni Gealon sa tanan nga kinahanglan gyud morespeto sa usa’g-usa. – /GMR) (BANAT NEWS)