Lalaki nasakmitan og armas, granada, shabu

CEBU, Philippines – Gidakop sa polis ang usa ka lalaki nga giingong adunay gibitbit nga armas sa Kagudoy, Basak, Dakbayan sa Lapu-Lapu sa niagi’ng Biyernes sa gabii.

Matud ni Senior Police Officer 3 Nonilon Estonilo, imbestigador sa Marigondon Police Station, nga ila’ng gidakop si Avelino Oyao, 45-anyos, residente sa maong dapit, alas 10:20 sa gabii.

Nasakmit sa kapolisan ang usa ka .357 caliber nga adunay lima ka bala, usa ka Granada ug lima ka gagmay’ng pakete sa shabu samtang ang suspek ang gitanggong na sa Marigondon Police Station aron pasakaan og kaso.

Samtang ang kapolisan sa dakbayan lakip na ang Tourist Police Unit ang dungan nga nagpahigayon og checkpoint alas 12:01 kaganihang kadlawon subay sa election gun ban nga gimando sa Commission on Elections.

Inadlaw nga checkpoint ang himuon kada buntag ug hapon sa lima ka police stations sa dakbayan gawas sa mga sakop sa LCPO Headquarters ug TPU.( /GMR)  (BANAT NEWS)