Wa baliki sa bayot balay gisunog

CEBU, Philippines – Upat ka balay ang naugdaw diha sa Salinas Drive, Brgy. Lahug ning Dakbayan sa Sugbo sa nakalabay nga kaadlawon human gikatahong gituyo og sunog sa usa ka lalaki ang ilang balay kay kini gisapot.

Nagsugod ang sunog sa balay sa pamilyang Becher, diin ang kalayo gikan sa lawak ni Genesis Becher, 22.

Matud pa ni Senior Fire Officer 1 Geoffrey Solon, imbestigador sa kabomberohan, ilaha karong gisubay ang report nga naglagot si Genesis kay wala baliki sa iyang higala nga bayot maong gisunog niini ang iyang lawak.

Alas 2:30 sa kaadlawon sa dihang nadawat sa kabomberohan ang alarma sa sunog. Matud pa gisunog ni Genesis ang iyang mga sinina sulod sa iyang lawak hangtod midako ang kalayo.

Ang iyang inahan nga si Genevieve uwahi nang nakabantay sa sunog kay dako na kaayo kini.

Sumala pa ni Solon nga sa wala pa miulbo ang sunog, nakadungog pa ang inahan niini nga si Genevieve nga nagyawyaw ang iyang anak sulod sa iyang lawak nga nag-ingon: “puslan man nga ingon ani, mas maayo pa nga sunogon na lang ni.”

Pagkataud-taod, niulbo na ang kalayo gikan sa lawak sa anak.

Midugang si Solon nga pipila ka adlaw na ang nakalabay nabantayan sa inahan ang anak nga dili na kaayo mogawas-gawas sa iyang lawak.

Milanat pa og 20 minutos una pa nakontrolar ang kalayo apan nitapon na kini sa upat ka mga balay ug nakan-an sa kalayo ang laing usa.

Si Solon miingon nga gusto sa inahan nga pasakaan og kaso ang iyang anak gumikan sa iyang gihimo. Nasayran nga lakip sa naugdaw ang balay sa usa ka abogado.

Gibanabana nga P150 mil ang gibilin nga danyos sa maong sunog  ug swerte nga walay naangol sa insidente.

Kasamtangan karon nga gitanggong sa Mabolo detention cell ang ulitawo nga gikatakdang pasakaan og tukmang kaso. – /EIM) (BANAT NEWS)