Nagkarambola usa patay

CEBU, Philippines - Usa ka pamilya ang masulob-on nga misugat sa Pasko human duha ka miyembro sa ilang pamilya ang napatay ug nadunggaban human nga sila natripingan sa mga batan-on nga gibadlong kay nagpataka og pabuto niadtong alas 12:30 sa kaadlawon sa miaging Biyernes.

Ang insidente nahitabo sa eskina P. Del Rosario Extension ug V. Rama Avenue sa Barangay Calamba, dakbayan sa Sugbo.

Ang namatay mao si Kerk Ivan Sollano, 20, human gipusil sa bukobuko ug sa ulo samtang naangol usab iyang ig-agaw nga si Jenriel Sollano nga gidunggab. Ang pamilya Sollano mga residente sa kasikbit nga barangay sa Sambag 1.

Base sa imbestigasyon sa kapulisan, ang amahan ni Jenriel nga si Uriel maoy unang nakalalis sa grupo sa mga batan-on kay gisabaan kini sa ilang “boga” nga iyang nalabyan samtang nagsakay kini og motor.

Matud pa nga gitulisok ni Uriel ang usa nga si Raulito Labiste apan gisukmag kini sa kauban niini nga si Wilbert Torno ug nahagba kini sa yuta.

Si Roger Escaran, usa ka barangay tanod nga nakakita sa panghitabo mao’y niuwang sa away ug gitabangan pagpatindog si Uriel ug nipauli sa ilaha, apan paglabay sa pipila ka minutos ang anak ni Uriel nga si Jenriel ug ang pag-umangkon nga si Kerk Ivan, naabot kuyog ang uban pa nga miyembro sa pamilya niini aron komprontahon ang mga nanapat sa iyang amahan.

Apan ang komprontasyon miresulta sa karambola ug napusilan ni Labiste si Kerk Ivan ug nadunggaban ni Torno si Jenriel. Gidala sa tambalanan ang duha apan nakabsan gyud sa kinabuhi si Kerk Ivan.

Ang mga suspek miikyas human sa hitabo apan nitahan kagahapon sa hapon ug gipaslak na sa San Nicolas Police Station.

Samtang usa ka lalaki ang nalandig sa tambalanan human siya gidunggab sa iyang silingan tungod sa iyang pagbadlong sa bata nga dili magpataka og pabuto diha sa ilang lugar sa Sitio Nonoc, Barangay Tabunok, Dakbayan sa Talisay atol sa pagsugat sa Pasko.

Ang biktima mao si Jeric Donel Ohagan, 22, samtang ang suspek mao si Lolito Mabunay, 45.

Si Police Officer 3 Junyl Ater sa Talisay City Police nagkanayon nga ang anak sa suspek gikatahong nagpabuto ug naigking ang biktima mao nga iyaha kining gibadlong.

Apan matud pa pagkadungog sa suspek nga gikasab-an sa biktima ang iyang anak nasuko kini ug nakiglalis sa biktima nga misangpot sa pagpanunggab.

Ang suspek ug ang biktima naglalis ug sa kalagot sa suspek nibunot kini og kutsilyo ug gihansakan sa tiyan ang biktima hinungdan sa pagkalandig niini sa tambalanan samtang ang suspek diha na nabuntagan sa prisohan. (BANAT NEWS)