Tag P15 mil bonus sa Capitol employees

CEBU, Philippines – Makadawat ang mga kawani sa Kapitolyo karong adlawa sa  ilang incentives  (Miyerkules) matud sa payroll-in-charge sa probinsiya kagahapon. Si Dominic Castroverde nagkanayon nga kagahapon pa sa buntag nadawat nila ang payroll sa incentive gikan sa accounting ug giproseso usab dayon nila kini. Ang matag regular nga kawani sa Kapitolyo lakip na niini ang mga casual nga nakatrabaho sulod na sa upat ka buwan makadawat og P15,000 nga cash incentives matag usa kanila.

Ang Kapitolyo duna kini 1,430 ka regular ug casual ka kawani. Niining ulahi giaprobahan sa hunta probinsiyal atol sa ilang special session ang P235.4 milyones nga supplemental budget diin P20 milyones niini alang sa incentive.

Si Castroverde nagkanayon nga ideretso na og deposit ngadto sa mga bank accounts sa mga kawani ang maong incentives.

Matud ni Castroverde nga natuman gyud nga wala pa ang Pasko makadawat na og incentives ang mga kawani. Sa laing bahin, sayo pa si Provincial Budget officer, Danilo Rodas nagkanayon nga ang gobernador nakahukom nga mohatag og incentive kini human nga ang probinsiya sa Sugbo napiling usa sa competitive province lukop nasud.

Ang National Competitiveness Council of the Philippines maoy mihatag sa nahisgutang pasidungog ngadto sa probinsiya. – /EIM) (BANAT NEWS)