Preparasyon sa Sinulog 2016 nibuylo na

CEBU, Philippines – Hinay-hinay na nga nangandam ang Sinulog Foundation Incorporated (SFI) alang sa umaabot nga kasaulogan sa Sinulog sunod tuig.

Gibutyag ni Ricky Ballesteros, Executive Director sa SFI anaa na sila karon sa implementation stage sa ilang preparasyon alang sa umaabot nga selebrasyon sa Sinulog 2016.

Dugang ni Ballesteros, gawas sa stage nga ilang giusab nga maoy sayawan sa mga contingents wala silay gipatuman nga laing mga kausaban.

Nasayran usa sa mga preparasyon nga gihimo sa SFI mao ang pag-introduce sa ilang bag-ong contest category nga mao ang DJ-mixing competition.

Subay sa maong selebrasyon dunay hangyo si Ballesteros ngadto sa mga event organizers nga dili mobutang og mga kalihukan subay na sa rota sa carousel.

Pahinumdom usab niini ngadto sa publiko nga dili magpalabi og inom aron malikayan nga mahubog diha sa kadalanan.

Sa pagkakaron wala pay nalista nga mga contingents ang SFI alang sa Sinulog Grand Parade sanglit gitutukan una nila ang preparasyon alang sa Sinulog sa Kabataan ug Lalawigan.

Hinuon gilauman sa SFI dili gihapon  mo-menus sa 30 ka mga contingents gikan sa nagkalain-laing lugar ang mosalmot sa kalihukan.

Ang premyo alang sa mga mananaog sa maong selebrasyon giatiman na usab sa siyudad sa Sugbo ug ang kulang gikan sa mga sponsorship.

Nagsugod na usab sila sa pagpamaligya og ticket alang sa Sinulog diin ang presyo susama ra gihapon ang labing menus anaa sa usa ka libo ka pesos ug ang labing mahal mokabat sa P2,500.

Gitataw ni Ballesteros ang Sinulog sunod tuig duna gihapoy kalabutan sa umaabot usab nga 51st International Eucharistic Congress (IEC) diin ang grand finale ug mga mananaog sa Sinulog Kabataan mosayaw sa IEC.

Tungod kay duha ka dagkong kalihukan ang mahitabo sa buwan sa Enero ang preparasyon sa seguridad sa Sinulog pinasubay usab sa IEC tungod kay gilauman nga bagang duot sa katawhan ang mangabot sa Sugbo. – /EIM) (BANAT NEWS)