P15 mil bonus sa taga kapitolyo
CEBU, Philippines - Makadawat og tag P15,000 nga incentives ang tanang opisyal ug mga kawani sa Kapitolyo sa dili pa ang Pasko.
Kini ang gipahibawo ni Provincial Budget Officer Danilo Rodas human giduso ni Gobernador Hilario Davide III ang P235.4 milyones nga supplemental budget ug P20 milyones niini alang sa incentives.
Ang probinsiya aduna’y 1,430 ka kawani lakip na niini ang mga casual nga nakatrabaho sulod sa upat ka buwan sugod niadto’ng buwan sa Septiyembre.
Samtang “in-kind” lang ang madawat sa mga job order (JO).
Si Rodas nagkanayon nga ang gobernador nakahukom nga mohatag og incentives human ang Probinsiya sa Sugbo napili’ng usa sa competitive province lukop nasud.
Apan pipila ka kawani sa Kapitolyo managlahi ang reaksiyon sanglit sa nilabay’ng tuig nakadawat sila og dili mominus P22 mil ug tunga sa sako nga bugas ug laing 5-kilos nga bugas sa mga JO.
Bunos na lang ang gipaabot sa mga kawani sa Kapitolyo human nga nadawat na nila ang ilang mandatory nga 13th month pay niadto pang nakalabay’ng buwan sa Nobiyembre.
Gikatakda nga tukion sa Provincial Board sa special session karong adlawa ang giduso nga supplemental budget samtang ugma ang Christmas Party sa Kapitolyo.
Nalakip sa supplemental budget ang P8.5 milyones alang sa operasyon sa mga district hospitals; P198.3 milyones alang sa development projects ug P28.5 milyones sa ubang items. (BANAT NEWS)
- Latest
