Tulo nakuhaan og P125 mil shabu

CEBU, Philippines - Tulo ka gikatahong suspetsado sa drugas ang gidakop sa kapolisan atol sa gipahigayon nga buy-bust operation sa Sitio Maxima, Barangay Punta Engaño sa Dakbayan sa Lapu-Lapu sa miaging Martes sa hapon.

Ang nadakpan mao sila si Renato Talingting, 38, ug Luchi Mahusay, 32, pulos residente sa maong dapit ug si Rosalita Taghoy, 26, taga Sitio Buyong, Barangay Maribago.

Matud ni Police Chief Inspector Mark Sucalit, hepe sa Lapu-Lapu City Police Office- City Intelligence Branch, 24 ka gagmay’ng pakete ug laing duha ka medium size pakete sa gituohang shabu nga mokabat sa P125 mil ang nasakmit gikan sa mga suspek.

Gawas sa drugas, nakuha ‘sab sa kapolisan gikan ni Talingting ang usa ka improvised shotgun ug duha ka bala niini ug ang P550 nga gidudahang halin sa ginadiling drugas.

Si Talingting nalakip sa Top Ten Most Wanted Drug Personality sa dakbayan ug   maoy main subject sa buy-bust matud ni Sucalit.

Nakumpiska sab sa kapolisan ang mga nagkalain-laing drug paraphernalia ug usa ka brown nga wallet gikan ni Taghoy, samtang na-rekober sab nila ang buy-bust money nga P200. (BANAT NEWS)