Suspek sa shootout may tulo ka warrants

CEBU, Philippines -  Number 1 most wanted sa lungsod sa Argao nga suspek sa pagpamanhig  sa grupo ni Dumanjug Vice Mayor Efren Gica sa nakalabay nga semana  ug natanggong sa karsel sa Dumanjug gihatdan og tulo ka warrants of arrest sa kapolisan sa Argao.

Sa paghatud sa maong warrants of arrest sa kasong pagpatay, frustrated murder ug illegal possession of firearms, personal nga nagkita ang hepe sa kapulisan sa Argao nga si Senior Inspector Alejandro Batobalonos ug ang suspek nga si Bemar Mejares alyas Jimboy.

Si Batobalonos mialegar nga sa dihang wa pa nadakpan si Mejares, gipadad-an siya niini og text message nga nihagit kaniya nga paadtuon didto sa ilang dapit sa Brgy. Apo kay panitan niyang buhi ang hepe sa kapolisan.

Si Mejares dugay nang gipangita sa kapolisan sa Argao tungod sa nagpatong-patong niining kaso.

Nadakpan sa kapulisan sa Dumanjug si Mejares diha sa Barangay Masa human sa binakbakay niadtong nakalabay nga adlaw  diin napatay ang iyang duha ka kauban nga sila si Marciano Tiwan ug Wilfredo Albios nga konsehal sa maong barangay. 

Si Mejares matud pa ang suspek sa pagpatay sa usa ka konsehal sa Barangay Manatad lungsod sa Sibonga.

Si Batobalonos miingon nga dihang iyang gipangutana si Mejares bahin sa text niini kaniya mihimakak kini.

Sumala pa ni Batobalonos, daghang kaso ang nasulbad dili lang sa Argao kun dili lakip na sa silingan nga mga lungsod, Dakbayan sa Carcar ug posible pa sa Dakbayan sa Sugbo  tungod kay gituohang maabot ang operasyon sa gun for hire business niini sa lagyong dapit. Nagduda usab ang kapolisan nga gamitong goon sa mga politiko si Mejares karong umaabot nga piniliay. Si Mejares sakop sa grupo ni Nilo Quirante sa Dumanjug nga usa usab sa suspek sa ambush sa grupo ni Gica.

Karong adlawa ipasaka sa kapulisan sa korte ang mga kaso batok ni Mejares sama sa ilegal nga paghupot og armas, multiple attempted murder ug paghupot og drug paraphernalia.

Si Police Officer 1 Vilma Caballero, assistant investigator sa Dumanjug Police miingon nga ang ilang kaso nga ipasaka kang Mejares kauban sila si Quirante lahi sa kaso nga ipasaka sa grupo ni Gica.  (BANAT NEWS)