Mga polis “nangilkil” sa drayber og van

CEBU, Philippines – Tulo ka polis nga nadestino sa Minglanilla Police Station ang imbestigahon sa pasangil nga nangilkil og kuwarta sa drayber nga ilang gisita didto sa Barangay Tungkop kaniadtong Miyerkules sa gabii tungod kay nagsinelas nga nagmaneho sa sakyanan. Usa sa imbestigahon mao si PO1 Renato Masangkay, nga naila tungod kay nagsul-ob kini og uniporme nga adunay name plate atol sa maong higayon, samtang ang laing duha ka polis wala pa hiilhi.

Ang mireklamo didto sa Cebu Provincial Police Office mao ang 22-anyos nga si Ruben Rosell, taga Barangay Ibabao-Estancia, Mandaue City ug nagmaneho sa usa ka wing van. Giangkon ni Rosell nga wala siya magsapatos atol sa maong higayon.

Gilatid sa lagda sa pagmaneho’g sakyanan nga gidili ang pagsul-ob og sinelas samtang mag-drive. Gipangayoan sila og P1,000 aron dili sakmiton ang lisensya ni Rosell.

Giawhag unta ni Rosell ang mga polis nga isyuhan na lang siya og Temporary Operators Permit (TOP) aron makapadayon na sila sa ilang biyahe, apan mapugsanon ang mga polis nga mobayad lang sila og P1,000.

Matud ni Rosell nga aron dili malangan ang ilang biyahe paingon sa Argao, gihangyo nila ang mga polis nga P500 lang ang ilang ibayad, ug misugot usab si Masangkay ug ang laing kauban niini nga polis. Ang ikatulo nga polis didto ra sa ilang patrol car nga giparada sa daplin sa karsada.

Si Rosell nakadungog og mga estorya sa mga drayber og habal-habal didto sa maong dapit nga ang maong mga polis kanunay gayud nga mangatang og mga drayber didto sa mao nga dapit ug ilang pangilkilan.

Ang chief investigator sa CPPO nga si PO3 Norman Años miingon nga kuhaan nila og affidavit si Rosell ug patubagon usab nila si Masangkay aron sutaon kun kinsa ang iyang duha ka kauban diha nga gipara nila si Rosell.

Hinuon si Rosell miingon nga dili pa siya mohukom kun pasakaan ba gayud niya’g kaso ang maong mga polis kay ang gusto niya nga hunongon na lang ang daotan nila nga binuhatan.

“Ang ako lang ba nga dili na to nila usbon kay dili baya lalim mangita og kuwarta, unya nagtinarong baya mi,” sumala pa ni Rosell. (Jojo C. Ugdol/RUB)(BANAT NEWS)