Batang “kawatan” gipatay sa Minglanilla
CEBU, Philippines – Menor de edad nga gipasanginlang kawatan ang gipatay kagahapon sa kaadlawon diha sa Sitio Estaca, Barangay Tunghaan, Lungsod sa Minglanilla.
Nakit-an ang patay’ng lawas sa biktima mao si Leonides Briones, 16 anyos, kinsa giila sa iyang inahan nga taga Sitio Bacay, Barangay Tulay, Minglanilla.
Si Chief Inspector Franco Rodulf Oriol, hepe sa kapulisan sa lungsod sa Minglanilla nagkanayon nga ang mga residente sa lugar nakadungog og buto sa armas hinungdan nga ilang gitawag ang kapulisan. Ang mga nirespondeng pulis ang nakakita sa lawas sa biktima nga naligo sa kaugalingong dugo human makaangkon og samad pinusilan sa iyang ulo. Sa pagkakaplag sa lawas sa biktima, wala dayun siya mailhan ug nagsul-ob lang kini og yellow nga t-shirt, checkered nga shorts, adunay kawo nga itom.
Apan pagkaudto na siya kagahapon nailhan pinaagi sa iyang inahan nga niadto sa punerarya.
Si Oriol nisaysay nga ila pang giimbestigaran kun si kinsa ang responsable sa maong krimen, apan base sa ilang pakisusi, ang biktima pirmeng maoy pasanginlan nga kusog mangawat sa maong dapit. – /EIM) (BANAT NEWS)
- Latest
