Kusog mangilog og pasahero gipatay

CEBU, Philippines – Nisudlot ang mata sa usa ka drayber sa electronic tricycle human kini gipusil sa wa mailhing mamumuno diha sa Burgos St., Barangay Dumlog, siyudad sa Talisay niadtong Biyernes sa buntag.

Naila ang biktima nga si Melanio Junio, 57,  taga sitio Paglaum, Barangay Dumlog.

Matud pa ni Police Officer 3 Jason Del Campo sa Talisay City Police nga nahinabi sa Banat News, gikan nipalit og numero sa lotto ang biktima ug nagbarugbarog kini sa nahisgutang lugar samtang naghuwat og pasahero.

Apan sa kalit lang adunay duha ka mga wala mailhing tawo nga nagsakay sa usa ka motorsiklo ang nangabot sa lugar ug ang backrider nikanaog ug gilipot ang biktima dayon pusil tumong sa luyo sa ulo niini.

Ang bala nilapos sa iyang agtang hinungdan nga nisudlot ang mata niini ug nakaingon sa iyang pagkahagba.

Gidala ang biktima sa Talisay City District Hospital apan nakabsan sa iyang kinabuhi. Ang mga mamumuno yano nga nisibat palayo sa dapit.

Si Del Campo nagkanayon nga ang kabanay sa biktima ang nihulagway sa namatay nga buotan ug way kontra sa ilang dapit hinungdan sa ilang kahibulong kun nganong kini gipusil.

Apan ang kapolisan mohimo og imbestigasyon kabahin sa impormasyon gikan sa mga kaubang drayber sa e-trike nga matud pa kusog kaayong mangilog og pasahero ang namatay.  Sigun pa nila nga hilig kining mosagol aron makakuha og pasahero ug mas barato kini maningil og plete.  (BANAT NEWS)