‘No fly zone’ makahasol sa mga pasahero

CEBU, Philippines – Gipahimangnuan sa kadagkuan sa GMR-Megawide Cebu Airport Corporation ang mga pasahero sa Mactan Cebu International Airport (MCIA) nga mokonsulta kanunay sa mga airline companies sa dili pa moadto sa tugpahanan.

Matud ni Estee Marie Plunket,  pangulo sa Corporate Affairs sa GMR-Megawide Cebu Airport Corp. adunay gipatuman nga 'no fly zone' sa kaulohan gumikan sa pag-abot sa mga lider sa nagkadaiyang  nasud nga apil sa gipahigayon nga Asia Pacific Economic Cooperation(APEC) meetings alang sa ilang seguridad.

Gipanglantawang daghang maaberya nga mga pasahero nga matanggong sa mga tugpahanan tungod sa maong gipatumang seguridad. Ang APEC meeting nga gipahigayon sa kaulohan nagsugod kagahapong adlawa Nobiyembre 16 nga molanat hangtud sa Nobiyembre 20.

Gitug-an ni Plunket kagahapong adlawa, lima ka flights ang gikanselar sa mga airline companies,  25 ka flights ang kanselado karong adlawa ug unom ka flights sa Huwebes ug 15 ka flights sa adlaw nga Biyernes.

Pahimangno ni Plunket sa mga pasahero nga motawag daan sa mga airline companies aron dili sila mahasol ug aron usab dali na lang ang magpa-reschedule sa ilang mga biyahe sulod ning semanaha. – /EIM) (BANAT NEWS)