Nag-motor natumbahan sa poste patay

CEBU, Philippines - Maayo’ng pagkabuak sa helmet ug grabe’ng angol sa ulo hinungdan nga nakutloan sa kinabuhi ang drayber sa motorsiklo nga  natumbahan sa poste nga gidasmagan sa usa ka Isuzu Dmax sa Bangkerohan, Consolacion pasado alas 2 sa nakalabay nga hapon.

Giila ang namatay nga si Lloyd Fanilag, 46, taga Dakbayan sa Mandaue, samtang ang drayber sa Isuzu Dmax mao si Bonifacio Madaya Jr., 53, taga Dakbayan sa Talisay.

Matud ni Police Officer 1 Jean Pierre Punay, traffic investigator sa Consolacion Police, nga nahinabi sa Banat News nga nagdagan sa sama’ng rota ang duha ka sakyanan paingon sa dakbayan sa Mandaue.

Pag-abot sa mao’ng dapit diha’ng paingon mo-overtake ang motorsiklo kalit lang nawad-an og kontrol ang pick-up ug didto nadasamag sa poste sa Visayan Electric Company kilid sa karsada.

Maayo’ng pagkabali sa poste ug didto nitugpa sa ulo sa drayber sa motorsiklo hinungdan nga pwerte’ng buaka sa helmet sa biktima kinsa suway pa unta nga gidala sa Mandaue District Hospital apan patay na kini nga naabot sa tambalanan.

Nagkaatubang na ang pamilya sa duha ka partido sa buhatan sa kapolisan ug inisyal nga nitunol sa pinansyal nga tabang ang pamilya sa drayber sa pick-up.

Samtang sa lungsod sa Dumanjug, usa ang patay ug duha ang angol human nagsungag ang duha ka motorsiklo sa Barangay Tapon pasado alas 5 sa nakalabay nga hapon. Patay atol sa insidente si Mario Toquero, 53, biyudo nga taga Barangay Tangil, samtang nalandig sa tambalanan sila si Carlo Sumampong, 20, ug ang iya’ng back rider nga si Dave Montealpo, 21, pareho’ng taga Lungsod sa Ronda.

Sa inisyal nga imbestigasyon sa Dumanjug Police nasayran nga subay sa managlahi’ng direksyon ang duha ka motorsiklo ug pag-abot sa mao’ng dapit kalit lang nawad-an og kontrol si Sumampong ug nisampak sa motorsiklo ni Toquero.

Gipangdala sa Barili District Hospital ang tulo ka biktima apan nakabsan gyud sa kinabuhi si Toquero. -/GMR (BANAT NEWS)