Drayber gipusil, pasahero ang naigo patay

CEBU, Philippines - Patay ang 27-anyos nga babaye nga padulong unta mosimba human mao’y naigo diha’ng ang drayber sa PUJ nga iya’ng gisakyan gipusil sa duha ka tawo nga nag-motor sa Poblacion, Dakbayan sa Lapu-Lapu alas 5:30 sa buntag kagahapon.

Patay diha-diha si Anna Glend Villaruel, 27-anyos, taga San Miguel, Pusok ug trabahante sa Yuen Thai sa Mactan Export Processing Zone.

Samtang naangol ang driver sa PUJ nga si Romeo Flores, 49-anyos, taga Pajo, kinsa naigo sa wala’ng bahin sa paa ug ang laing pasahero nga naglingkod sa front seat.

Si Villaruel nakaangkon og samad-pinusilan ubos sa iya’ng ilok lapos sa pikas nga bahin sa lawas nga niresulta sa iya’ng kamatayon.

Sa pakisusi ni PO3 Joseph Cutanda sa homicide section sa Lapu- Lapu City Police Office nga dili si Villaruel ang target sa pagpamusil.

Matud ni Cutanda nga ang driver mao unta ang target sa namusil.

Nasayran nga una’ng nition sa pusil ang usa sa mga suspek ngadto ni Flores kinsa nakalihay apan naigo sa ikaduha’ng pabuto.

Ang laing naangol mao si Sherwin Salazar, 32-anyos, taga Lungsod sa Cordova kinsa naigo sa tuo’ng bukton.

Matud ni Cutanda nga padulong na manaug si Villaruel sa diha’ng nahitabo ang insidente.

Dugang ni Cutanda nga si Flores nitug-an nga may kalalis nga laing PUJ driver sa niagi’ng buwan apan wala kini siya nakaila. - /GMR (BANAT NEWS)