Kabataan paglaom sa nasud — Roxas

CEBU, Philippines - Ania sa Sugbo si Liberal Party presidential candidate Mar Roxas aron mangampanya sa mga Sugbuanon alang sa umaabot nga piniliay sunod tuig.

Gipakigkitaan ni Roxas ang mga tinun-an sa University of the Visayas ug iyang gipahibalo kanila ang iyang mga plano kun siyay palarong mahimong pangulo sa nasud.

Mitambong sa kalihukan sila Kongresista Gerard Anthony “Samsam” Gullas ug apohan niini nga si kanhi kongresista ug karon Talisay City mayoralty candidate Eduardo “Eddiegul” Gullas, Naga City Mayor Valdemar Chiong, Minglanilla Mayor Elanito Peña ug Neneth Reluya kinsa magpapili pagkamayor sa lungsod sa San Fernando.

Si Roxas mipahinumdom sa mga tinun-an nga sila mao ang paglaom sa nasud dungan sa pagbida sa mga maayong nahimo sa “Daang Matuwid” sa administrasyon ni Presidente Benigno Aquino III  nga plano niyang padayunon.

Matud pa ni Roxas, sa nakalabay nga 30 ka tuig makaluluoy ang kahimtang sa nasud ug gani gitawag pa kini og “sick man of Asia” apan naputol kini paglingkod ni Aquino ug gibansagan na karon ang Pilipinas nga “Asia’s brightest spot.”

Game usab kaayong gitubag ni Roxas ang mga pangutana sa mga tinun-an, usa niini mao ang kabahin sa K to 12 Program, unsay mga plano niini alang mga magtutudlo sa public ug private school teachers.

Matud ni Roxas, uyon siya sa K to 12 program tungod kay dili na mabentahaan ang mga Filipino kun sila manarbaho gawas sa nasud kay sama sa ubang nasud 12 ka tuig na sab ang atong basic education.

Samtang alang sa mga magtutudlo, si Roxas mipasalig nga dili siya mohunong sa pagpalambo sa natad sa edukasyon.

Dihang nahuman na si Roxas sa diyalogo adunay gihimo nga mubong panagpulong sa iyang mga kapartido, apan giklaro ni Eddiegul wala sila maghisgot og politika.

‘’There was no talk about politics, I was there and it’s all development which is very Mar Roxas,’’ sigon pa ni Gullas. Gibutyag usab niya nga gitunol sa iyang apo nga si Kongresista Gullas ang manifesto sa suporta sa mga mayor sa unang distrito ngadto kang Roxas.

Si kanhi kongresista Gullas masaligon nga modaog gyud si Roxas tungod kay nasuwayan na ang katakos niini.  (BANAT NEWS)