Paki-masa ni Robredo iya’ng bintaha
CEBU, Philippines - Giangkon ni Kongresista Leni Robredo sa Camarines Sur nga ang iya’ng pagka-makimasa ang iya’ng bintaha sa tanang magpapili sa pagka-bise presidente sa 2016 nga eleksiyon.
Kini ang iya’ng gipadayag atol sa pagbisita sa dakbayan sa Sugbo kagahapon alang sa nagkadaiya’ng kalihukan.
Una’ng gipakigkitaan ni Robredo kauban nila ni kanhi senador Francisco "Kiko" Pangilinan ug Kongresista Cres Paez, kanhi mayor Tomas Osmeña, Konsehal Alvin Dizon, mga sakop sa urban poor sector, LGBT, youth, BPO industry ug uban pa sulod sa AVR sa University of San Carlos diin naminaw kini sa mga yangungo ug problema sa katawhan.
Human sa pakigpulong ni Robredo pinaagi sa pagpaila sa iya’ng kaugalingon ug sa mga proyekto nga nahimo, nihangyo kini sa mga nanambong nga bag-o pa man siya ug dili pa siya ilado nga ipanabi na lang kung kinsa siya. Sunod nga gitambungan ni Robredo ug kaubanan ang Alternative Lawyering and Participatory Governance Forum sa Wrocklage sa mao’ng tunghaan nga gitambungan sa mga tinun-an.
Gipasabot ni Robredo sa mga tinun-an ang kalainan sa alternative lawyering diin wala na siya nakahigayon pagtubag sa mga pangutana tungod kay aduna siya’y daghan pa’ng kalihukan nga giapas.
Giklaro ni Robredo nga may kamatuoran seguro ang pangangkon sa uban nga nisabay lang siya sa kasikat sa pangan sa iya’ng bana nga si kanhi DILG secretary Jessie Robredo tungod kay dili na man kini mawala sa iya’ng kaugalingon kay nahimo man kini niya’ng bana ug ang mga maayo’ng buhat mao man usab ang iya’ng gitamdan isip usa ka pamilya.
Si Robredo nibutyag nga ang maayo’ng hiyas ug ang pagpakita sa mga tawo ilabi na sa masa mao’y iya’ng tinguha tungod kay gusto niya’ng ipakita sa katawhan ang pagka-siya ug dili ang pagpaka-aron ingnon lang. (BANAT NEWS)
- Latest
