1,325 bala, habak nasakmit sa MCIA

CEBU, Philippines - Dili na bag-o ang panghitabo kabahin sa mga madakpang nagdala og bala diha sa mga tugpahanan ilabi na diha sa Mactan-Cebu International Aiport sumala pa sa mga opisyal niini.

Kini maoy reaksyon kabahin sa kontrobersiya nga mitumaw didto sa Ninoy Aquino International Airport (NAIA) labot niining gikahadlokang “laglag/tanim-bala” scam.

Ang General Manager sa MCIA Nigel Paul Villarete mipasabot nga nanakop na usab sila niini kaniadto pa dinhi kay duna gyuy mga pasaherong magsuot og habak o anting-anting nga ginama sa bala.

Karong tuiga, gikan sa buwan sa Enero hangtod ning tungora walay nadawat nga report ang kadagkoan sa MCIA nga dunay nabiktima aning laglag/tanim-bala.

Niadtong tuig 2014 gikan sa buwan sa Abril hangtud sa buwan sa Disyembre miabot sa 1,386 ka amulets nga ginama sa basiyo sa bala ug 297 ka buhing bala ang ilang nasakmit.

Samtang  karong tuiga, gikan sa buwan sa Enero hangtod ning buwan sa Nobiyembre anaa sa 1,044 ka amulets ug 281 ka live bullets usab ang ilang nasakmit. 

Karong tuiga usa lang ka tawo ang ilang napasakaan og kaso gikan sa tanan nilang gisakmit ug kini nahitabo niadtong buwan sa Enero ug usa usab sa miaging tuig.

Samtang si Senior Superintendent Joselito Salido, pangulo sa Aviation Security Group -7 usa ka Filipino ang napasakaan nila og kaso.

Matud pa niya, ang Office For Transportation Security (OTS) adunay mga pamaagi pagsusi sa mga bagahe sa mga pasahero. Ang OTS supervisor nga si Jemay Nietes miangkon nga nahiubos sila tungod sa maong kontrobersiya kay wa nay salig kanila ang mga pasahero. Karon, hugot nilang gipatuman sa mga screeners nga basta dili makasamad, dili makamatay o di mobuto, mahimo na lang nilang palabyon ug permanente ang “no contact policy” o di paghikap sa mga bagahe hangtud nga dili molapas sa ilang x-ray machine.

Kung dunay makit-an sa x-ray , ipahunong ang conveyor diha sa x-ray tunnel aron litratohan ug ipatawag ang mga polis una pa ipatawag ang tag-iya sa bag.

Giawhag nila ang mga biyahidor likayan ang pagdala og mga butang nga gidili sa mga tugpahanan ug di mogamit og hinuwaman nga mga bag. (BANAT NEWS)