Gitadtad og bala

CEBU, Philippines – Gitusaktusak sa bala ang lawas ug gitiwasan pa gyud human nahagba ang usa ka mag-uuma atubangan sa iyang asawa samtang kini nagtadtad og karne sa baboy alang sa pagsaulog sa kalag-kalag sa gawas sa ilang balay sa diha sa Cantipla 1,  barangay Tabunan ning dakbayan sa Sugbo, kagahapon sa alas 10 sa buntag.

Wa na matabang sa mga doktor sa Perpetual Soccour Hospital si Melencio Borres, 37, nagpuyo sa maong lugar gumikan sa kadaghan sa samad pinusilan nga iyang naangkon.

Matud pa ni Senior Police Officer 2 Wetzel Berry, imbestigador sa Homicide Section nga nahinabi sa Banat News miingon nga usa ka gunman nga nagdala og duha ka mga armas ang mirapido sa biktima.

Sumala pa ni Berry nga igo lang gisugo si Borres sa iyang silingan sa paglimpyo ug pagtagod sa karne sa baboy sa dihang kalit lang naabot ang gunman nga nagsakay og motorsiklo.

Wala’y langay nga mibunot sa iyang duha ka mga armas ang gunman human kini nanaog sa motorsiklo dayong pusil sa biktima nga naigo dayon sa dughan.

Human nahagba giduol pa kini sa gunman ug gitiwasan sa pagpusil ug gisiguro nga wala nay kinabuhi sa wala pa kini mibiya sa lugar.

Wala nagtaptap sa nawong ang gunman, apan wala’y bisan usa sa mga nakakita ang nakaila niini sa maong dapit.

“Mura og si Rambo nga tagduha ka armas ang gidungan og pusil. Dako gyud siguro to og kalagot kay gisiguro man gyud sa gunman nga mapatay ang biktima. Unya kursonada kaayo kay wala’y taptap sa nawong,” matud pa ni Berry.

Si Berry nagtuo nga dili “mistaken identity” ang hitabo kay hayag man gihimo ang krimen ug klaro man ang nawong sa biktima.

Apan tanghaga pa karon sa kapulisan kung kinsa ang gunman ug unsa ang motibo niya tungod kay ang asawa sa biktima nga wala makahinumdom nga adunay kontra ang iyang bana.

Usa sa mga gisubay karon sa kapulisan kung duna bay nakaaway ang biktima niining nanglabay nga adlaw nga lagmit maoy mihimo sa krimen.

Wala’y nakuha nga basiyo sa bala ang kapulisan sa crime scene kay gipanghilabtan na sa mga tawo ang maong dapit. – /EIM) (BANAT NEWS)