Davide way klarong baruganan —JVR

CEBU, Philippines - Gihulagway ni Mayor Johnny de los Reyes sa siyudad sa Talisay si Gobernador Hilario Davide III nga huyang og baruganan dihang giendorsar niini i Mayor Nice Apura sa Siyudad sa Carcar bisan dili sakop sa Liberal Party.

"Paminaw nako it should not be. You have to stand kung unsa imong paglaban sa partido. Mao bitaw nga nagkayabag ni," matud pa sa mayor.

Gusto ni de los Reyes nga barugan gyud unta ni Davide bahala na og unsa pa ang mahitabo. Miangkon usab siya nga wala siya konsultaha sa LP bahin sa himuong desisyon ni Davide sa Carcar

"Murag dili maayo ang iyang gibuhat," si de Los Reyes niingon sa Banat News.

Sa nasayran, si Mayor Apura sa Carcar sakop sa Alayon Party ang niingon dili tuod sila official candidates sa LP apan sila mga espesyal tungod sa ilang pagkasensiro sa paglaban ni Davide ug Mar Roxas.

Wa hinuon nabalaka ang mayor nga i-endorsar usab ni Davide si kanhi kongresista Eduardo Gullas kinsa moatbang kaniya sa pagkamayor sa Talisay.

Samtang si Konsehal Dennis Basillote nga maoy running mate ni de Los Reyes midason sab sa pamahayag sa mayor batok ni Davide.

Matud pa niya, barugan gyud unta sa gobernador ang iyang partido ug dili magpadala sa Alayon tungod kay hagbay ra silang nagbalhin-balhin og partido.

"Ato lang ning paminawon ang katawhan kay ang iyang desisyon dili man maayo para niya, sa katawhan ug diri namo kay ang iyang liderato weak," asoy pa ni Basillote.

Tungod sa maong kalamboan, gipanglantawan nga madeklarar nga ‘sona libre’ sa LP ug Alayon ang dakbayan sa Carcar.

Kini tungod kay si Davide giingong dili kini mokampaniya sa habig sa Liberal Party ug Alayon sa siyudad pag-abot sa bangga sa lokal nga mga kandidato.

Apan ang slate ni Raul “Yayoy” Alcoseba (LP) kinsa moatbang ni Apura isip mayor sa siyudad sa eleksiyon sa sunod tuig gihatagan ni Davide of certificate of nomination and acceptance (CONA).

Ang Alayon misaad nga mosuporta kang Davide ug Bise Gobernador Agnes Magpale, Mar Roxas ug Kong. Leny Robredo.

Si Magpale mibutyag kagahapon nga niadtong Miyerkules sa gabii siya  ug si Davide nagkaestoryahanay kabahin niini ug giingong mamahimong ‘sona libre’ ang Carcar.

Si Magpale mihulagway hinuon sa gibuhat ni Davide nga usa ka sakripisyo sa iyang kaugalingon alang sa LP ilabi na kang Roxas.  (BANAT NEWS)