Hapon, tindahan biktima sa salisi

CEBU, Philippines – Mokabat sa P140 mil nga balor sa kwarta ug kabtangan ang nawala sa usa ka Hapon nga nakawatan sulod sa usa ka coffee shop sa mall sa Barrio Luz, dakbayan sa Sugbo sa niagi’ng hapon.

Ang biktima naila nga si Akira Sugihara, 60, lumad nga taga Sizuoka City sa Japan ug temporaryo nga nagpuyo sa usa sa mga hotels sa dakbayan sa Lapu-Lapu.

Base sa imbestigasyon, mga alas 12:50 niadto’ng Sabado sa hapon, si Sugihara uban ang iyang girlfriend nanginom og kape sulod sa coffee shop sa mall ug gibutang ang bag sa iya’ng kiliran.

Apan pila ka minutos ang nilabay samtang nagtabi-tabi sa iya’ng uyab, iya na lang nabantayan nga wala na ang iya’ng bag nga adunay sulod nga mahalon nga butang ug kwarta.    Gawas sa iya’ng Coach brand bag nga tag P15,000, lakip sa nakawat gikan kang Sugihara mao ang wallet nga Bvlgari brand nga tag P40,000, Docomo smartphone nga tag P20,000, Oakley sunglasses nga tag P15,000, salapi nga P50,000 ug mga credit cards.

Samtang pipila ka minutos ang nilabay, usa na sab ka tindahan sulod sa mao nga mall ang nabiktima sa shop lifting ug nakuha ang ila’ng baligya nga mga T-shirts.

Ang representante sa tindahan nga si Maribel Leopoldo, 25, personal nga ni-report sa kapolisan kabahin sa panghitabo.

Matud ni Leopoldo nga ang pagpangawat nahitabo mga ala 1:45 sa hapon niadto’ng Sabado samtang sila nag-take sa ila’ng break ug nagtabi-tabi sa tindahan ang uban. Apan aduna nala’y nag-ingon sa ila nga nakakita nga aduna’y lalaki ug babaye uban ang usa ka menor de edad ang kalit nga niduol sa tindahan og gikuha ang 10 ka T-shirts nga aduna pa’y printa nga “GOD IS IN CONTROL” nga tag P420 ang usa.

Ang mga imbestigador sa Theft and Robbery Section sa Cebu City Police Office nisubay na karon sa mga footages sa closed-circuit television (CCTV) camera sulod sa mall sa pag-ila sa mga nangawat.

Kahinumduman nga niingon si Chief Inspector David Señor, ang hepe sa TRS, nga ang mga kawatan nga kasagaran nalambigit sa pagpanulis ug pagpanglabni sa kadalanan nibalhin na sa mga malls human gipakatap ang mga pictures sa ila’ng hulagway sa kadalanan.

Si Señor nipahimangno nga magmabinantayon gyud bisan pa man og naa sulod sa mga malls. - /GMR) (BANAT NEWS)