Mga Ouano nibiya sa LP

CEBU, Philippines – Hingpit na nga nibiya ang kampo sa mga Ouano sa dakbayan sa Mandaue ug sa ikaunom nga distrito gikan sa Liberal Party.

Kini human si Konsehal Emmarie “Lolypop” Ouano-Dizon ug kaubanan ang gituboy sa One Cebu Party nga kandidato sa pagka-mayor sa dakbayan sa Mandaue sa eleksiyon sunod tuig.

Ang ilang kandidato sa pagka-gobernador mao si Atty. Winston Garcia ug pagka-bise gobernador nga si Dr. Nerissa Soon-Ruiz, sila ang niisa sa mga kamot sa grupo ni Ouano-Dizon atol sa general assembly sa One Cebu kagahapon.

Lakip sa gipaila nga kandidato sa One Cebu ang pagpasubli sa amahan ni Lolypop nga si Bokal Thadeo “Teddy” Ouano ug anak niini nga si kanhi bokal Alfred Francis “Alfie” Ouano sa pagka-konsehal sa lungsod sa Consolacion.

Sayo niini si Ouano-Dizon nagpaabot kung kinsa tali nilang Kongresista Gabriel Luis “Luigi” Quisumbing ang ituboy sa LP sa pagka-mayor apan hangtud kagahapon wala pay hukom ang LP.

Kung madayon si Quisumbing sa pagdagan sa pagka-mayor sa dakbayan sa Mandaue, hayan iyang makaatbang si Ouano-Dizon.

Unang giplano sa LP ang pagpuli og posisyon nilang Quisumbing ug Mayor Jonas Cortes kinsa mapupos na ang termino sa pagka-mayor.

Ang mga Ouano sakop sa One Cebu apan nitapon sa LP sa eleksiyon sa 2013.

Gikatakda karong Miyerkules ang pagsang-at sa certificate of candidacy sa grupo ni Ouano-Dizon.

Iyang ikapares sa pagka-bise mayor si Konsehal Bethoven Andaya samtang mga konsehal sila si Emiliano Rosal, Tipolo kapitan Procopio Villanueva, Atty. Erwin Heyrosa, Looc kapitan Cesar “Sol” Cabahug, Elmer Cabahug, Malcolm Sanchez, George Mendoza, Edward Monsanto, Konsehal Benjamin Basiga ug Jagobiao kapitan Editha Monteza. - /EIM) (BANAT NEWS)