Margot nangayo’g pasaylo sa Abella Clan

CEBU, Philippines - Nangayo og pasaylo si Konsehal Margarita Osmeña sa Abella Clan subay sa alegasyon nga nangayo og kwarta ang pamilya ngadto sa kagamhanan sa dakbayan alang sa ila’ng tinuig nga reunion.

Matud ni Konsehal Gerardo “Gerry” Carillo nga kagahapon giklaro ni Osmeña nga wala nabutang ang P112 mil sa supplemental budget nga mao’y napasanginlan nga hinungdan nga nadugay ang paghatag sa bonus sa mga kawani sa City Hall. Apan tug-an ni Carillo nga adunay mga pagkaon nga gipanghatud atol sa ila’ng reunion sayo’ng buwan ni’ng tuiga.

Dugang ni Carillo nga andam sila modawat og pagkaon gikan sa nagkalainlaing tawo kun may ganahan mohatag kanila.

Kini tungod usab kay giila ang ila’ng pamilya nga usa nga inila sa syudad isip heritage families kinsa nakatampo sa paglambo sa syudad.

Mapasalamaton si Carillo sa pasidungong nga gihatag sa syudad ngadto sa ila’ng pamilya.

"Nangayo og pasaylo (Osmeña) ug we deeply appreciate it," matud ni Carillo.

Tug-an pa ni Abella nga gidawat nila ang pagpangayo og pasaylo ni Osmeña bisan pa man daghan og negatibo nga komentaryo batok sa ila’ng pamilya sa diha’ng nitumaw ang kontrobersiyal nga pasangil batok kanila.

Adunay dili mominus singko mil ka sakop sa pamilya ang nagpuyo sa dakbayan sa Sugbo. (BANAT NEWS)