Basillote modagan sa PB

CEBU, Philippines - Nagtinguha si Konsehal Dennis Basillote sa dakbayan sa Talisay nga mopapili sa pagkasakop sa hunta probinsiyal sa una’ng distrito.

Matud ni Basillote nga daku siya og kahigayunan nga modaug sa posisyon.

Nasayran nga bakante karon ang duha ka pwesto sa hunta probinsiyal sa una’ng distrito sanglit mapupos na ang termino ni Bokal Julian “Teban” Daan samtang si Bokal Raul “Yayoy” Alcoseba nga anaa pa sa una’ng termino ang modagan sa pagka-mayor sa dakbayan sa Carcar.

Ang Alayon Party nidiga na sa ila’ng baraha nga kun wala’y kausaban, sila si kanhi bokal Raul Bacaltos ug ang asawa ni Daan nga si Yolly ang ila’ng kandidato.

Matud ni Basillote ang iya’ng track record ug ang gidugayon sa serbisyo nga 12 ka tuig isip kapitan sa Dumlog ug 12 ka tuig nga konsehal hangtud karon mao’y daku niya’ng bintaha batok sa kaatbang.

Si Basillote nahimo usab nga outstanding barangay captain.

Nagkanayon si Basillote nga si Bacaltos ka duha na napilde samtang si Yolly napilde na usab kaniadto.

Gibutyag ni Basillote nga ang Talisay daku og botante diin mao’y klaro’ng mobotar kaniya samtang pun-an na lang sa botos sa ubang lugar nga igo na’ng makapadaug kaniya.

Base sa record sa diha’ng si Basillote pa ang chairman sa committee on education, siya ang responsable sa pagpausbaw sa honorarium sa mga teacher aide volunteer ug mga honor students, pagpaayo sa mga gubaong tunghaan sa Talisay ug pag-establisar sa mga nagkadaiyang tunghaan ug extension nga mga tunghaan ug uban pa.

Samtang isip chairman sa committee on shelter, urban and rural development, si Basillote mao’y nagmugna sa site development sa relocation site nga gigastuhan sa World Bank, Localized Community Mortgage Program ug mga ordinansa nga makaayo alang sa urban ug rural community.  (BANAT NEWS)