Tinun-an gituok patay

CEBU, Philippines – Kinsay magtuo nga sulod sa gwardiyadong subdivision sa barangay Suba-Masulog, dakbayan sa Lapu-Lapu adunay mahitabong linuog nga krimen ug ang kriminal hangtud karon wala pa gihapon mailhi.

Ang maong krimen maoy nitapos sa kaugmaon sa 17-anyos nga tinun-an sa University of San Carlos nga si Karen Kaye Montebon,  kinsa napalgan sa iyang amahan sud sa lawak niini nga wa nay panimuot ug nagkadugo.

Ang biktima nakaangkon og daghang bun-og sa iyang lawas nga gituohang resulta sa pagkulata ug nakita usab sa crime scene ang wire sa plantsa sa buhok nga gihigot sa liog niini nga gituohang maoy hinungdan sa iyang kamatayon.

Matud ni Police Senior Inspector Zenaido Pastorfide, hepe sa Homicide Section sa Lapu-Lapu City Police Office (LLCPO), nag-inusara ra sa ilang panimalay ang biktima kay nanglakaw ang iyang mga ginikanan.

Wala’y nakitang force entry ang mga imbestigador ug posible sa pultahan miagi ang mga kriminal.

Samtang si Sr. Supt. Armando Radoc, director sa LCPO miingon nga aduna na sila’y gisundan karong anggulo apan wala pa sila’y pangalan sa kriminal.

Matud pa adunay nakakitang silingan nga adunay babaye ug lalaking nagmotor nga pulos sila naka-full faced helmet ang miadto sa panimalay sa biktima.

Ang mga silingan ni Montebon, nakadungog nga ang babaye’ng angkas nagsige og panuktok sa pultahan apan wala niini tangtanga ang gisul-ob nga helmet.

Wala usab ma-record sa log book sa guwardiya kadtong mga naka-motor nga katapusang nakita human mahitabo ang krimen ug wala’y CCTV camera nga makatabang unta pag-ila sa mga nagmotorsiklo.

Wala’y nadungog nga komosyon gikan sa ilang balay. Dili pa usab kasulti ang kapulisan kun gilugos ba ang biktima ug paabuton una nila ang autopsy report.

Apan nawagtang ang camera ug ipad sa biktima. “There are lot of valuable item nga wala gikuha, from that, the way I look at it, as investigator there is something nga na-recorded ato (gadgets) it’s either sa camera or sa ipad nga interesado ‘tong mikuha,” sigon pa ni Radoc.

Sa pakighinabi sa Banat News sa usa sa mga board of directors sa Corinthians Homeowners Association nga si Merly Abella, kini miingon gumikan sa hitabo gipangtaktak ang tanang guwardiya ug giilisan ang ilang security agency aron mas pahugtan pa nila ilang seguridad.

Di na basta makasud ang si bisan kinsa kun wala’y nakaila nga molupyo. Sa laing bahin, nasubo ang mga tinun-an  ug mga magtutudlo sa USC Main Campus sa gidangatan ni Montebon kinsa nagtuon og accountancy. Gumikan sa maong hitabo, ang mga classmate ni Montebon, gipaubos sa stress debriefing sa mga guidance counselors human nga daghan kanila ang naghinilakay atol sa ilang klase.

Ang Office of the Student Affairs nga gipangulohan ni Niel Steve Kintanar, nipagawas og memorandum nga ang Carolinian Community nakugang ug nasubo sa gidangatan ni Montebon.

"We condemn this heartless act of killing, and we hope that justice will be serve." Sugod karong adlawa hangtod ugma giawhag niya tanang mga estudyante sa USC nga magsul-ob og itom nga t-shirt agi og pagpakita sa ilang kasubo sa gidangatan ni Montebon. – /EIM) (BANAT NEWS)