Wa hatagi’g kwarta naghikog
CEBU, Philippines – Labihan ang gibati’ng kaguol sa usa ka anak human iya na lang nadiskubrehan nga naghikog patay ang iya’ng amahan nga nangluod kay wala tagai niya og kwarta sa sitio Buwanan, Sibugay, dakbayan sa Sugbo alas 8 sa nakalabay nga buntag.
Ang naghikog patay mao si Tito Ardiente, 51, nga nagpuyo sa mao’ng lugar.
Sumala pa ni Senior Police Officer 2 Rommel Bancog, imbestigador sa homicide section sa Cebu City Police Office, nga nahinabi sa Banat News nga niadto’ng nakalabay nga adlaw nangayo og kwarta si Ardiente sa anak apan wala hatagi.
Pasado alas 8 sa nakalabay nga buntag samtang nagpaabot ang asawa nga si Suzette sa gawas sa ila’ng balay sa namaligya og isda, ang usa ka anak nga si Zoren ang nagpahibawo kaniya nga naghikog si Tito sulod sa iya’ng lawak.
Gamit ang pisi mao’y gihigot sa liog nga iya sab gibaat sa taas sa beam sa atop.
Nagduda si Bancog nga gawas sa pagpangluod lagmit ang gibati ug giantus niya nga sakit sa likod ang usa sa hinungdan nga kini nagkutlo sa iya’ng kinabuhi.
Taud-taud na sab diay nga nag-agwanta si Ardiente sa angol sa iya’ng likod hinungdan nga kini maglisud sa paglakaw.
Si Bancog niingon nga labihan intawon og hilak sa anak ni Ardiente nga una’ng nibalibad sa paghatag og kwarta sa iya’ng amahan kay kini nagtuo nga mao’y hinungdan sa pagpangluod ug naghikog. – /GMR) (BANAT NEWS)
- Latest
