Barko sa Trans Asia nakabiyahe na

CEBU, Philippines – Giklaro sa tigpamaba sa Trans Asia Shipping Abner Llenos nga gitugotan sa Maritime Industry Authority (MARINA) nga makalawig pagbalik ang MV Trans Asia 2 human kini gisuspenso sud sa pipila lang ka oras.

“Human sa thorough inspection nga gihimo sa MARINA, gitugutan ang among barko nga maka resume last night,” pagklaro pa ni Llenos.

Matud ni Llanos nga minor lang nga aberya ang nahitabo sa ilang barko dihang nipalyar ang makina niini niadtong Domingo sa gabii  pipila ka oras human sa pagbiya niini sa Ozamis City padulong Cebu City. Ang pagkaaberya nakalangay sa pagdunggo sa maong barko sa Cebu. Ang tigpamaba sa MARINA nga si Atty. Jose Cabatingan nagkanayon nga ang barko nakasinati og “engine problem with its turbo charges”  ug “starboard proportion engine.”

Apan matud ni Llenos nga dali kining naayo sa ilang mga tawo ug ang kapitan sa barko nidesisyon nga mopadayon sa pagbiyahe. Matud niya nga  alas 7:30 ngadto sa alas- 8 sa buntag niadtong Lunes unta moabot ang barko sa Sugbo apan tungod sa maong aberya  nalangay sila og abot alas 9:43 na sa buntag.

Hinuon gisabot ni Llenos nga “procedural”  lang ang pagsuspenso sa barko samtang kini gipaubos sa inspeksyon apan human nasiguro nga naayo na kini gitugotan dayong makabiyahe pagbalik ang maong barko niadtong Lunes sa gabii padung sa Ozamis City.

Sumala pa ni Llenos, dili lang ang barko ang ilang gitan-aw kondili hasta ang kahimtang sa ilang mga tawo ug sa mga sakay niini. – /EIM) (BANAT NEWS)