Trak nga nagkarga’g balas gisikop

CEBU, Philippines – Gitanggong sa Toledo City Police Station ang usa ka mini-dump truck nga puno sa karga nga balas tungod sa kapakyas sa drayber niini pagpresentar og mga dokumento alang sa paghakot niini.

Ang maong sakyanan gimaneho sa usa ka Jerry Cuison dihang nadakpan sa checkpoint sa Brgy. Ilihan sa maong siyudad.

Way delivery receipt ang drayber dihang gipangitaan sa mga sakop sa Provincial Environment Natural Resources Office PENRO. Tungod niini pamultahon ang tag-iya sa maong sakyanan ug buhian lang kini kun makapakita og kumpletong rekisitos.

Gihingusgan sa PENRO ang kampanya batok sa ilegal nga kargamento sama sa balas ug graba hilabi na kun walay mapakitang dokumento tungod kay ang pagpangubkob niini maoy usa sa nakitang hinungdan sa pag-awas sa mga sapa sa kabukiran panahon nga dautan ang panahon. – /EIM) (BANAT NEWS)