Bana gipadakop
CEBU, Philippines – Nag-atubang karon og daghang kaso ang usa ka bana human nga gipadakop sa iyang asawa tungod sa pagkahingulata niini ug nasakmitan usab og shabu, armas ug mga stubs nga gamiton sa ilegal nga suwertres.
Ang pag-aresto nahitabo sa District 2, Brgy. Pulpogan, sa lungsod sa Consolacion alas- 4 pasado ang takna sa hapon niadtong miaging adlaw.
Si Police Officer 1 Socrates Borinaga sa Consolacion Police Station miingon nga gitanggong karon ang 49-anyos nga suspek nga nagpuyo usab sa maong dapit.
Matud pa ni Borinaga nangayo og panabang sa ilang buhatan ang 48-anyos nga asawa sa suspetsado tungod kay gikulata kini sa suspek ug aduna kini daghang mga bun-og sa kalawasan.
Gumikan sa maong reklamo dali nilang giadto sa panimalay ang maong suspetsado apan naaktohan kini nila nga nag-fax sa mga tally sheets sa ilegal nga sugal nga suwertres.
Dihang ilang girekisa ang kalawasan niini, nakuhaan kini og kalibre 38 rebolber nga giluklok sa iyang hawak ug usa ka gamay nga paketeng shabu ug drug paraphernalia.
Ang suspetsado nga nagtingkagol karon sa sulod sa selda sa ilang bilanggoan ilang pasakaan og kaso sa pagkulata sa iyang asawa, ilegal nga paghupot og armas, paghupot og shabu ug drug paraphernalia ug ilegal nga sugal. – /EIM) (BANAT NEWS)
- Latest
