Wa’y downpayment ipadawat sa hospital

CEBU, Philippines - Giawhag ni Konsehal Alvin Dizon ang mga tambalanan sa dakbayan sa Sugbo sa pagdawat sa mga pasyente bisan wala’y ikabayad nga downpayment.

Matud ni Dizon nga daghan siya’ng nadawat nga reklamo nga wala atimana ang pasyente kay wala’y pasiuna’ng ikabayad. Kini kalapasan sa Republic Act 9439 nga nagdili pagtanggong sa pasyente nga may bayranan pa sa tambalanan ingon man ang Republic Act 8344 ug Batas Pambansa 702 nga nagdili sa pagpaningil og downpayment.

Matud ni Dizon nga suportado sa Private Hospital Association of the Philippines (PHAPhi) – Cebu ang iya’ng giduso nga ordinansahon.

Ubos sa ordinansahon ni Dizon, gimandoan ang mga tambalanan sa pagplastar sa nahisgutang mga balaud aron masayud ang mga tagtungod sa pasyente. (BANAT NEWS)