Lola ni Mica Ella niabot sa sugbo

CEBU, Philippines – Dili pa unta takna aron mobiyahe sa Sugbo ang apohan ni Mica Ella Sharpe, 11, apan tungod sa iya’ng kalit nga kamatayun uban sa iya’ng inahan nga si Virginia Sharpe, nibiyahe gyud kini bisan sa dagku’ng bawod.

Niabot kagahapon sa buntag gikan sa San Isidro, Northern Samar si Adelaida Castillo, 74, apohan ni Mica Ella sa habig sa iya’ng amahan.

Matud ni Castillo nga sa graduation pa unta sa apo sunod tuig siya moanhi sa Sugbo labi na nga kandidato kini isip valedictorian ug garbo kini niya bisan pa man og wala magkadayun ang amahan ni Mica Ella nga iya’ng anak ug si Virginia.

Apan matud niya nga wa siya magtuo nga abo nalang sa bata ang iya’ng maabtan.

Naninguha unta og abot og sayo ang apohan apan tungod kay baluron ang kadagatan nadelatar sila hinungdan nga wala na maabti ang patay nga lawas sa mag-inahan ug gi-cremate na.

Alang kang Castillo mas maayo’ng hukmang patyon ang mga suspek tungod sa linuog nga binuhatan.

Alang sa Briton nga bana ni Virginia nga si Robert Sharpe nga angayan usab mabulok sa bilanggoan ang mga suspek tungod kay dili na mabalik ang kinabuhi sa iya’ng minahal sa kinabuhi. Matud ni Sharpe nga dili siya makaako magtan-aw sa tulo ka suspek nga sila si Manuel Gomera Labrador, Estelito Sasidor Recamora ug George Mamac Baquiran tungod kay sakit kaayo para kaniya ang kamatayun sa iya’ng mag-inahan.

Si Narcisa Quijano, inahan ni Virginia, sa iya’ng bahin nipadayag nga andam siya manglimbasog aron makuha sa hingpit ang hustisya ug makonbikto ang mga sinumbong.

Matud ni Chief Inspector Richard Gadingan, hepe sa Minglanilla Police Station, nga si Labrador nitug-an nga siya mao’y nagpatay sa manag-inahan hinungdan nga himuon niya’ng testigo si Baquiran ug Recamora batok ni Labrador, apan mag-atubang gihapon og kaso ang duha. – /GMR) (BANAT NEWS)