Amahan, anak nalamba sa motor angol
CEBU, Philippines - Nalandig sa tambalanan ang amahan ug anak human nalamba ang gisakyang motorsiklo sa aspaltado’ng dalan sa sityo Looc Uno, Bato, dakbayan sa Toledo.
Giila ang mga biktima nga sila si Segundo Rodriguez, 60, mag-uuma ug anak nga si Xyl Rodriguez, 34, trabahante sa usa ka kompaniya nga gitukod sa nahisgutang lugar ug pulos taga sityo Mohon, Awihao, sa mao’ng dakbayan.
Base sa imbestigasyon nga gikuha sa amahan gikan sa trabaho ang anak sa barangay Bato sakay sa motorsiklo diha’ng kalit lang nibuto ang atubangan nga ligid sa gisakyang motor.
Nag ekis-ekis ang dagan ug nawad-an sa kontrol ang amahan nga nagmaneho ug nalamba sa aspaltado’ng dalan.
Nakaangkon og gadlas ug pangos sa kalawasan ang mga biktima hinungdan nga dali’ng gidala sa Toledo City Hospital samtang gibalhin ang amahan sa usa sa mga tambalanan sa dakbayan sa Sugbo tungod sa naangkon nga samad sa ulo. (BANAT NEWS)
- Latest
