Kulurom nga V-Hires mawagtang na

CEBU, Philippines - Ang mga kulurom nga V-Hire dili pasudlon sa pagamugnaon nga temporary terminal nga anha ipahimutang kilid sa karaan nga Compania Maritima dili halayo sa Plaza Independencia.

Gituohan nga mawagtang na ang mga kulurom nga V-Hire ug dili na maka-operate diha sa temporaryo nga terminal nga pagadumalahon sa mga kawani sa City Transportation Office kay pangitaan na sila og mga dukomento sama sa prangkisa sa unit.

Ang mga tagdumala sa V-Hire mosumiter og kopya sa ilang prangkisa gikan sa Land Transportation Franchising Regulatory Board (LTFRB) ug Drivers License aron sila makasulod.

Ugma, magpadayon ang pagdawat sa mga dukomento gikan sa mga tagdumala sa V-Hire. Nasayran nga daghang kolurom nga V-Hires ang nag-operate dinhi sa Sugbo.

Nasayran sa CTO nga adunay 148 ka V-hire nga magbiyahean  gikan dinhi sa dakbayan paingon sa Toledo ug Balamban, 60 para sa Dumanjug ug 30 sa  Barili.

Matud ni CTO executive officer Rey Gealon nga walay bayranan ang mga drayber sa V-Hire nga mogamit sa temporary terminal.

Ang mao nga mga V-Hire didto unta migamit sa pagpik-ap og mga pasahero sa One Citilink Terminal sa Natalio Bacalso Avenue apan gipasirad-an kini ni Mayor Michael Rama.

Ang mga V-Hire maka-parking sa temporary terminal duol sa Compania Maritima sugod alas 4 sa kaadlawon hangtud alas 9 sa gabii, ug walay tugotan nga maka parking tibuok gabii.

Matud ni City Administrator Lucelle Mercado nga temporary lang ang paggamit nila sa luna duol sa Compania Maritima kay nangita sila og tukma g’yud nga dapit nga kabutangan sa terminal.

Ang terminal destinohan og mga polis ug tanod.  (BANAT NEWS)